9 April: “Sasap ham ma salah ni sidea, ai seng ibotoh sidea na binahenni”

tnt_april9_jesustarsilang.jpg

“Ham Bapa! Sasap ham ma salah ni sidea, ai seng ibotoh sidea na binahenni”.

(Lukas 23:34)

In ma hata na parlobei iluarhon Tuhan Jesus humbani hayu parsilang ai. Dong do pitu hata ni Tuhan Jesus sanggah tarsilang Ia, tapi na parlobei ayat na i atas in ma.

Ijin ma taridah banggal ni holongni mangidah hita jolma pardousa. Iapiti do hita bani Naibata Bapa in. Ai paluahkon hita do Ia ase roh hu dunia on. Domma martahun-tahun Ia mardalani i Palestina, mangarahkon halak hubani harajaon ni Naibata. lurupi halak na sosak, na roh hu Bani, na boritan, na masombuh, na marsitaronon. Tapi buenan jolma manundalhonsi, isurakkon simbuei i Jerusalem, ase iparsilangkon Ia. Mintor ididah uhur-Ni do marah holi Naibata bani na marsilangkon-Si, bani pambahenan ni jolma on. Halani ai ma ase ipindouhon bani Naibata, ase isasap salah ni sidea ai, halani seng ibotoh na binahenni ai.

Pingkir ham lobei tongkin: Gok ma boritni na tarsilang ai, paku (pahat-pahat) ai mangantankon boratni, mambahen marigat tangan pakon naheini, ninuhur mandoruh ma Ia mangorongkon ai. Hape lupa do Ia mangorongkon ai, dousa (salah) ni hita jolma do iorongkon. Talu sitaronon ai ibahen banggal ni holong-Ni bani hita jolma pardousa.

Holong-Ni ai ma huahap mandokdok hita roh hu Bani, manrogop mangkatahon tarima kasih. Holong-Ni ai ma homa manlanglangi hita mardousa. Ai dousanta do itaron sanggah na tarsilang ai. Seng dong salah ni Tuhan Jesus. Matei pe Ia na so ingkat salahni do. Torang do ai isaksihon Panguhum Latus: “Seng dong jumpah ahu salah ni na morah on”. Ase halani dousa ni hita jolma do hansa ase matei Tuhan Jesus pala matei tansilang.

Tonggo

Ham Tuhan Jesus! Tarima kasih ma uhurhu Bamu halani iporsan Ham haganup dousangku bani hayu parsilang in. Urupi Ham ma ahu ase sai mangkawah ahu dompak Ham mardingat holongmu na so marsibar in.

Amen.

Doding

Haleluya No. 61: 2, 5: O, Ulu na sab daroh >>

2. Ham parsinalsal bohi, tarsulur sangap-Mu.
Ai mase ma marposi sab tijur huyum-Mu?
Ai aha ma halani ’se gombur mata-Mu?
Na miloh sinalsalsi, dob rotap hosah-Mu.

5. Malas tumang uhurhu janah sonang tumang
Mardingat pangkopkop-Mu hu bangku na hinan
Lang be huhabiari sonari dousangkin
‘Ge matei au sonari martuah au ijin

10 April: Mangkawah Bani Jesus na Tarsilang >>

<< 8 April: Akal ni si bolis