“Tulimati ham ma ahu Ham Naibata, anjaha tanda ham uhurhu, uji ma ahu anjaha tanda Ham pingkiranku anjaha tonggor ma atap dong dalan ni hamarsikon bangku anjaha togu ham ma ahu bani dalan sadokah ni dokahni”
(Psalm 139: 23,24)
(Terj. baru, LAI, 1976: “Pareksa Ham ma ahu, ale Naibata, anjaha tanda Ham ma uhurhu! Uji Ham ma anjaha tanda Ham ma pingkiranku! Kawahkon Ham ma atap dong mardalan ahu bani dalan hamagouan; togu Ham ma ahu bani dalan sisadokah ni dokahni.”)
Raja Daud na dob mamontas bagei sitaronon, domma marlajar mananda uhurni. Ididah do sai dong do lebogot-legot ni uhurni pasal haganup, halani ai seng sonang be ia bani timbaniganni sandiri, tapi mulak ma bani timbanigan ni Naibata, na mananda haganupan, na mananda tangkas age uhurni sandiri. Dob sonai uhurni, itonggohon ma tonggoni na tarsurat in.
Porluan ope hita mangindouhon lobih humbani Raja Daud. Hita lape somal mananda uhurta. Uhurta pe buei tumang do panggulmitonni. Ra domma idalani hita dalan dompak hamarsikon, na so ingkat ibotoh hita. Hatengeran ni uhurta do Naibata, na ra anjaha boi mamareksa uhurta pakon pingkiranta. Ase itogu hita bani dalan na sadokah ni dokahni.
Halani ai mulak ma hita bani Naibata, sopotkon hita ma dousanta ibagas tonggonta. Luarhon hita ma: Ajari ma ahu ase saud ahu maluah. Naibata do doktor ni uhur. Hu Bani ma paranggak ham uhurmu, ase ipareksa, ase ioperasi janah itambari, gabe boi pakeon hu hagoluhan na sadokah ni dokahni. Ididah Naibata do surdung ni uhurta atap dompak ja pe, sai ipatudu do hita bani dalan na torsa.
Sasintongni ham pe namin itanda ham do uhurmu. Tapi hita jolma sai sihol apitanta do dirinta, gabe lang sintong be panandoanta ai. Tapi anggo Naibata, marhitei Hatani pakon manrigapi uhurta, taridah ma haganup sambor ni tonduyni, taridah ma butakni, taridah ma mangirni. Tapi boi do ai burihan ni daroh ni Tuhanta Jesus Kristus, na dob matei mangkopkop hita.
Roh ma hita bani Naibata patidakkon ganup hinasambor m uhurta, ulang marponopan ham dompak Naibata, ai ididah do ganupan. Jadi isapu ma kotoran ni uhurta ai pansing, dob ai isuan ma uhur pakon pingkiran na baru hubagas uhurta.
Tonggo
Ham Naibata, sitanda uhur pakon pingkiran ni jolma! Pareksa Ham ma uhurhu pakon pingkiranku, togu Ham ma ahu bani hagoluhan na sadokah ni dokahni. Amen.
Doding
Haleluya No. 50: 2, 3: Sai Na Margantih Taun on >>
2. Iudut Ham do hosahkin paidah-idah ahu,
Atap na dong do buah ni horja-Mu in hu bangku;
Hape gati hiranan Ham: Buah ni in seng jumpah Ham
3. Ra ma manringis Naibata mangidah parlahouhu;
Ra ihatahon: “Roboh ma haron na so behangku;
Seng ongga ra marbuah in, benaha be marguna in!”
Recent Comments