3 Agustus: Ulang Holsohan

tnt_agu3_mat6_25

“Ulang holsohkon hanima hosahnima pasari-sari sipanganon barang angkulanima mansarihon parhiouon: ai lang harganan hosah ase sipanganon? Ai lang harganan angkula ase parhiouon?”

(Mateus 6 : 25)

Ipindo uhur ni Naibata do ase pongkut janah hatengeran ni uhur hita bani horjanta. “Na so ra marhorja, ulang ma ia mangan.” Ipindo uhur ni Naibata do ulang ransah (lojar) hita, ningon palar (hemat) hita. Ningon martanggung-jawab hita pasal haganupan pambahenanta lobei ni Tuhanta. Masuk do ai pansarihon ni Naibata banta, bani goluh ari-ari on. Ra do Naibata mamasu-masu horjanta barang aha pe ihorjahon hita, isarihon Naibata do hita ari-ari pasal na porlu bani goluh on. Tenger ma gelah uhurta bani Naibata janah hatengeran ni uhur homa hita bani sagala horjanta, isarihon do hita.

Pasal niombahmu pe ulang pala ham rusak, age naring sonaha ididah ham parlahouni asal ma torang ibobai ham anjaha iondoskon ham bani Naibata, Bapanta na i nagoriatas ai. Dihut do sidea isarihon Naibata. Ai sedo pitah anakmu ai, dihut do anak ni Naibata. Sarionkon ni Naibata do na porlu bani nasiam.

Seng be dong sisonangkon ni ai, anggo tenger tumang uhurmu. Na martenger ni uhur bani Naibata, seng anjai tarbador. Hosah, siharganan marimbang sipanganon domma ibere Naibata banta, jadi mangudud hosah binereni ai, seng anjai tumaram lang ibere sipanganon, gari siharganan (hosah), goluh ai ibere, samintolah ma sipanganon na manambat goluh ai lang ibere?

Badan, angkula domma ibere. Jadi pamalut ni angkula ai tontu ibere ma parhiouon. Atap mamboli aha hita hun toko, seng pala nasahapkon ibahen do pambungkusni (pamalutni). Domma ibere Naibata angkula badan in banta, tontu pamalutni ai pe bereonni do, ai ma parhiouon. Tenger ma uhurta pasal ai.

Tonggo

Ham Tuhan Naibata, Bapanami na i nagoriatas! Tarima kasih ma Bamu na tongtong mansarihon pargoluhonnami na dob in. Sonai do arapannami torus sarionkonmu hanami hunjon hujanan.

Amen.

Doding

Haleluya No. 6 :1 – 4: Ham do Ipuji Uhurhon >>

1. Ham do ipuji uhurhon Jahowa Tuhankin
Huambilankon do tongtong, ganup binaen-Mu in

4. Ai Ham do na margogoh in, sitompa haganup:
Ham do na pagoluhkon in, marmuduhon ganup.

<< 2 Agustus: On do hasonangan bani goluh on4 Agustus: Isarihon Naibata do goluhmu >>