25 Maret: Holong bani Jesus Songon Mungkani

Tapi dong do hurang ni uhurhu dompak ham, halani itadingkon ham holong ni uhurmu bani mungkahni ondi”.
Terjemahan baru (LAI 1973), “Tapi adong do panghurangi ni uhurhu dompak ham, ai ma: Itadingkon ham do holong ni uhurmu na bani mungkahni ondi”.

(Pangungkapon 2: 4)

Ingat ham lobei sonaha uhurmu baru-baru ihaporsayai ham Tuhan Jesus, atap baru marguru Kristen, atap baru tardidi barang baru manaksihon haporsayaon. Iahapkon ham do dousamu borat songon siboanon na borat. “Dousangkai, dousangkai” nimu. Ipindahi ham partolongan pasal ai, ase mardamei pakon Naibata, ibere homa gogoh mangimbang sibolis. Dob ai ididah ham ma Jesus, iparlajari ham ma: Manaron na marsik do la janah matei bani hayu parsilang, halani dousanta, halani dousamu. Iguruhon ham homa: Dong do hasasapan ni dousa marhitei goran ni Tuhan Jesus Kristus. Longang uhurmu mase ra Tuhan Jesus paluahkon ham. Ijai ma mamungkah holong ni uhurmu, ai ma holong ni uhur na bani mungkahni ai.

Dob salpu atap piga-piga tahun, sonaha do holongmu na bani mungkahni ai? Atap roh borgohni do? Ra domma buei idalankon ham na mardomu bani haporsayaonmu bani Tuhan Jesus, tapi songon na manongtong, songon na so ra tambah haporsayaonmu ai.

Tapi mardingat ma ham, ijolom ham ope holong ni uhur na bani mungkahni ondi? Holong do uhurmu bani Tuhan Jesus songon bani mugkahni ondi? lahap ham do holong ni Tuhan Jesus bamu tong do songon mungkahni ondi?

Nini Tuhan Jesus banta: “Hubotoh do sagala horjamu pakon paruntolonmu ampa hasabaronmu ampa na so tartahan ham parjahat. Ilajou ham do na mangkatahon Apostel sidea, hape sedo na tongon, parladung do sidea jumpah ham. Marsabar ni uhur do ham manaron halani goranku, seng marnaloja ham. Tapi dong do hurang ni uhurhu dompak ham, halani itadingkon ham holong ni uhurmu bani mungkahni ondi” (Pang 2: 2-4).

Tonggo

Ham Tuhan Jesus! Patotap Ham ma bangku holong ni uhur, songon bani mungkahni ondi. Sai totap ma holongmu bannami.

Amen.

Doding

Haleluya No. 197: 1, 2 >”>I Lambung ni Parsilang >>

1. I lambung ni parsilang do hasonangankin,
Na dong tarbaen be sirang uhurhu in hunjin.
Parsilang na i Golgata hu haholongi ho;
Ai rapat au bai Naibata na marhiteihon ho.

2. I lambung ni parsilang do pangarapankin,
Na lao hu bai na sonang nagori atas in.
Parsilang na i Golgata sitobus tonduyhin,
Sai sihol tong ma ho ratah idingat uhurhin.

26 Maret: Partolongan Bani Hasosakan >>

<< 24 Maret: Anggo Sai Duit Manggoki Uhur