26 Maret: Partolongan Bani Hasosakan

“Nini ma dompak inang-Ni: Andin ma inang anakmu. Dob ai nini ma dompak susianni: andin ma inangmu. Jadi hunjia nari ma ijalo susianni ia hu rumahni”.
Terjemahan baru (LAI 1973) “….ihatahon ma bani inangni ai: Andin ma inang, anakmu!  Dob ai ihatahon ma bani susianni ai: Andin ma inangmu! Olat ni ai nari ijalo susian ai ma ia hu rumahni”.

(Johanes 19: 26, 27)

Ilambung parsilang ni Tuhan Jesus, sanggah tarsilang Ia, jong-jong do inangni, si Maria. Igoki pusok ni uhur pakon jut ni uhur do ia. Anakni Sipaluah dunia on, sonari domma gantung bani hayu parsilang laho matei ma, itadingkon ma ia lang dong iahap be panungkolni.

Tapi Tuhan Jesus, na ibagas paruntolon pakon sitaronon na so dong tudosanni ai, seng lupa ia bani inangni si Maria ai. Iarusi do borat ni sitaronon ni si Maria ai. Laho pahampungkon ai, dob ididah susianni haholongan ni uhurni (si Johannes), jongjong homa ilambung ni si Maria, nini ma dompak inangni: Andin ma inang anakmu. Hunjia nari ijalo si Johannes ma si Maria nu rumahni.

Pingkir hita ma lobei banggal ni holong ni Tuhanta Jesus, sonai parah ni sitarononni, tongkin nari matei ma Ia, tapi seng lupa Ia mansarihon inangni. iondoskon bani si Johannes ase ia na songon gantih ni Tuhan Jesus ari-ari patorsa si Maria.

Anggo marpusok ni uhur hita, seng dong be ninuhurta na mangkawahkon hita, seng dong be hasomanta. Dong do hasomanta ibahen Tuhan Jesus Kristus. Domma ihatahon susianni: Ai ma sanina, ai ma botou. Gari sanggah manaron na parngit Tuhanta idingat do hinaholonganni tontu lobihni ai dob das ia hu surga idingat ma hita ganup na hinaholonganni, ai igoran do hita saninani pakon botouni. Roh do Ia mangurupi hita bani panorang na tinontuhonni, panorang hasosakan.

Pindoonta bani Tuhanta, ase tenger uhurta mangunsagahon partolonganni bani sagala panorang hasosakan banta.

Tonggo

Ham Tuhan Jesus! Patenger Ham ma uhurhu bani partolonganmu ibagas sagala hasosakanku. Tarima kasih ma Bamu halani banggal ni idop pakon holong to ateimu bannami. Seng ihalupahon Ham hanami.

Amen.

Doding

Haleluya No. 154: 4, 6, 7 Marsipota pe Idahon >>

4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.

6. Ia roh pe hamateian, seng be pala au songgotan,
sai hujolom Jesuskin, in ma diha-dihangkin.

7. Asal ma tongtong rupeihu holong atei ni Tuhanku;
‘Ge pe hu tanoman au, sungkup ondos Bani au.

27 Maret: “Sadari on ma ho rap pakon Ahu i Paradeiso!” >>

<< 25 Maret: Holong bani Jesus Songon Mungkani