“Tapi isorgang Jesus ma ia (tonduy na mabutak ai): sip ma ho! Mandarat ma ho humbani”.
(Lukas 4 : 35a)
Ia sibolis, tonduy na mabutak ai, marianan do i dunia on. Sai iuji do pabutakkon uhur ni jolma i dunia on. Buei do halak na manarehon uhurni bahen iananni ai janah mansuhuni pinindoni mambahen halak ase parmabuk, parjudi, parbangkis, parladung, panangko pakon na legan.
Mase sonai gogoh ni tonduy na mabutak ai. Ilajou do jolma in mangkatahon ibagas uhurni: seng mahua anggo sahali do, dob ai nini use: seng mahua anggo sahali-sahali do. Dob ai padam ma jolma ai janah hatagihan. Dob hatagihan lang tarpaluahisi be dirini.
Sonai do hertep ni bibir, hetel, na bueitu sahap matangkatai hasoman, manrisai hasoman, manturi-turihon na sahalak bani na legan, age seng dong porluni, na mangalop manaruhkon hata. Ganupan ai horja ni tonduy na mabutak ai do, lang tarpaluahi halak be dirini hunjai, lanjar sangkut ma ia bani tonduy habutakon ai.
Sonaha do ham na mambasa on, ijajah tonduy na mabutak ai do ham? Sihol maluah do ham humbani panjajahanni ai?
Anggo sihol do ham, roh ma ham bani Jesus Kristus na dob monang mantaluhon sibolis, ra do Ia mambere gogoh bamu laho manruntahon, manrutuskon rantei (gari) ni sibolis ai, atap dousa aha pe ai. Boi do gabe margogoh ham mangimbang sibolis ai. Boi do aturan ham hinan talu gabe ham monang ibahen. Seng dong na tarbahen manolong ham sobali Tuhan Jesus na dob monang mangimbang sibolis.
Na bajanni: Naagan seng ope diri talu ibahen tonduy na mabutak ai, hape domma ham tabanni. Tonduy ni Naibata do na boi patidak ai hu banta.
Tonggo
Ham Tuhan Jesus! Paluahi Ham ma hanami humbani sagala tonduy na mabutak, ase lambin susi hanami.
Amen.
Doding
Haleluya No. 115: 4, 8 Sadokah Ho i Tanoh On >>
4. Ambungkon humbai uhurmin na so margagan in
Ganup na humbai Tuhan in ramot ma jaga in.
8. Halani ai sai ringgas bei mangimbang dousa in
Ganup na hagoluhkon bei na humbai Tuhan in.
Recent Comments