“Ibagas (Kristus) do dapot hita partobuson marhitei darohni, ai ma hasasapan ni hasalahanta, mangihutkon idop ni uhurni na tarsulur in”.
(Epesus 1: 7)
Terjemahan baru (LAI 1973), “Ibagas Ia do dapot hita haluahon marhitei darohni, ai ma hasasapan ni panlanggaron, domu hubani habayakon ni idop uhurNi.”
Dong ma sada naboru na marumur 17 tahun, na nengel janah longah. Masuk ma ia hu parsikolahan ni sisonai. Na sain dokah seng ongga ibogei pasal Naibata, tapi i parsikolahanni ai ibogei ma pasal Naibata na pansing janah na pintor. Magigi tumang do ia bani dousa ni jolma. Haganup dousa ni halak isuratkon do bani buku banggalni.
Dob ibogei ai iahap naboru nongkan ma domma dihut ia bani buku banggal ni Naibata domma tarsurat sagala dousani ijai, jadi marhoru ma ia janah pusok tumang ma uhurni. Salpu ai ipatugah guruni ma bani: Ia Naibata na pintor ai, na magigi bani sagala dousa, maidop do uhumi bani sagala jolma pardousa, ai buei sitaronon ni halak halani dousa. Ipatugah guruni ai homa bani, domma isuruh Naibata Anakni Jesus Kristus mambuat dousa ni halak hubani dirini, gabe songon dousani sandiri. Jadi manaron na marsik ma la halani dousa ni jolma ganupan janah matei mangkopkop manisia.
Sonari barang ise na boratan bani dousa janah mangindo hasasapan ni dousa janah porsaya bani hasasapan ni dousa na binahen ni Tuhan Jesus, na dob igalar Tuhan Jesus utang dousani, gabe sasap ma utang dousa ai, gabe borsih ma alaman ni buku panuratan dousa ai.
Malas ma uhur ni naboru ai, dihut ma ia iahap masuk bani na hinopkop ni Tuhan Jesus janah gabe boru ni Naibata. Tapi seng tarpodom ia sabornginni ai mamingkiri na binahen ni Tuhan Jesus hubani pardousa ampa hubani sandiri.
Ningon porsaya botul do hita bani hasasapan ni dousa na binahen ni Tuhan Jesus.
Tonggo
Ham Tuhan Naibata! Tarima kasih ma Bamu, na maidop maambil bannami pasirsirhon hasasapan ni dousa marhitei daroh ni Tuhan Jesus Kristus,
Amen.
Doding
Haleluya No. 147: 4, 7 >”>Ham Naibata Banggal Tumang >>
4. Ai daroh-Mu na harga in, Jesus baen pardearan;
Sahei ijin do utangkin bai hayu na marsilang,
7. Bai idop-Mu ma uhurhin, sai sasap Ham dousangku,
Hu lambung-Mu ma tonduyhin bai rotap ni hosahku.
23 Maret: Sihol Maluah Do Ham Humbani Tonduy Na Mabutak Ai? >>
Recent Comments