“Ahu pe huhatahon ma bannima: parhuan ma halak marhitei arta na so bujur ase boiskonsi ai gabe ijalo ma hanima hubani ianan sadokah ni dokahni”. (Lukas 16:9)
Huja do ipakei ham artamu, huja do ipakei ham duitmu? Ipakei ham do ai patorsa dihadihamu?
Ra tene patorsa diri sandiri, patorsa rumahtangga sandiri. Ongga do ipingkir ham dompak halak na marhasunsahan na hasosakan halani na lang bani? Ongga do ibontas uhurmu halak na masombuh? Ongga do ibere ham gendo lobih-lobihmu bani sidea? Ra do ham mambere songon Naibata na ra mambere bamu?
Gati do hita songon na lupa bani horja ni haporsayaon. Ra do tene songon balosta:”Ahu pe sombuh do”. Age pe sonai dong do na boi bahenonmu, ai ma holongmu.
Holong ma sada sibere-bere na banggal. Porini iparayak ham na boritan gabe tarapoh uhurni mambogei hata ni Naibata pinatugahmu, banggalan do ai ase sibere-bere atap aha pe. Tapi sagala na tarbahen martolong marhitei arta (duit), dear ma natolong na porlu tolongon. Bahen ma huan-kuanmu marhitei uhur holong; ai ma sada pasu-pasu bani na marsitaronon. Ambah ni ai tene, bahen ham ma mardalan holongmu dompak na so mananda Naibata ope ase mulak ia mar-Tuhan, mulak manombah Naibata. Ai ma holi huanmu i nagoriatas.
Holong sisonai pasangonta do dompak Kristen na dob ganggang humbani Naibata. Sagala arta atap duit pe, seng dong na tarhatahon na bujur, na sintong. Ai duit na roh hu banta, atap na sonaha ma deba pardalanni marlegot-legot. Dong ma ai na dob mamontas dalan na so pintor tene. Tapi marhitei arta na so bujur ai pe tarbahen do huan-kuanta. Ambah ni ai ingatonta do: Martanggung-jawab do hita pasal sagala arta binere ni Naibata banta, atap sintong ipakei hita romban bani harosuh ni Naibata.
Ham Tuhan Naibata! Domma ihaholongi Ham ahu,urupi Ham ma ahu mangkaholongi na marmoluhon partolongan, na sosak, na masombuh, na boritan ampa na pusokan uhur. Amen
Haleluya No. 135: 2,5,6: I Surga do Huan-huanta >>
2. Simole-ole songon sanggar hasoman na i tanoh on;
Tongtong do Jesus na tarsulur, huan-Ni pe jonam tongtong.
Ai pe baen hita Jesus in tongtong huan-huanta in.
5. Sai humpit hita do uhur-Ni, sintong do parsaoran-Ni in;
Manongtong holong ni atei-Ni bai ganup niain-Ni in.
Ai pe baen hita Jesus in tongtong huan-huanta in.
6. O Jesus, huan-huannami, sai tangkap tangannami on.
Tongtong rajai ma uhurnami, hu surga boan hanai on.
Ijin ma tong parsaoran in sadokah ni dokahni in.
Recent Comments