22 Agustus: Pasu-pasu humbani Horja

tnt_agu22_horja

 

“Bani jolma sisonai ai isuruh anjaha ipaingat hanami ibagas Tuhan Jesus Kristus: saluju ma ihorjahon horjani, sinarini ma ipangan”. (2 Tesalonika 3: 12)

Domma ibogei Apostel Paulus piga-piga humbani pagori ni Kuria Tessalonika, na so margagan parlahouni, na so ra marbaenon (marlahoan), tapi mangkorjahon na so silahoan. Bani jolma sisonai ai ma ihatahon Apostel Paulus hata na iatas on.

Ia marhorja halak Kristen sedo halani jolma tumang, tapi mambalosi Naibata do. Domma ibere Naibaia banta horja atap aha pe, halani ai horjahon hita ma ai humbani bujur ni uhurta laho pasangapkon Naibata, mambalosi hata-Ni.

Banggal tumang do pasu-pasu roh humbani horja. Na so ra marhorja ai do sibuenan masuk tutupan. Marayoh ia mangkorjahon horja na madear jadi ihorjahon ma na ulang. Ai do ase iojur Naibata hita bani Titah IV, “Ibagas na onom ari ma horjahon horjamu”. Ulang tolu ari atap lima ari barang lima satongah ari hansa marhorja. Maningon gok do na onon ari ai.

Ibotoh Apostel Paulus “horja” ma sada tanda ni mar-Tuhan. Ai ma ase ipaksahon sidea marhorja, ase isari panganonni sandiri, ulang songon sigadon unsim marbois na i lambung. Porlu ma hata on iparimbagaskon parjudi, panangko, panrampok, pambongkar, ronsi tukang copet.

Halak na torus marhorja ai do na mangahapkon sonaha mantin ni na marsaran. Halak na torus janah na pongkut marhorja, seng sompat be ai mamingkiri dousa atap hajahaton. Songon hondor ni dousa do homa horja ai ibahen Naibata, anggo ra hita mandalankon.

Seng porlu marpilihan horja banta. Ai sagala horja na madear boi do ai parohkon pasu-pasu ni Naibata. Ase anggo banta i Indonesia on anggo ra do hita manjolom age aha horja, lang pala dong pengangguran, ai bolag ope tanohta pargesa-gesaanta.

 

Ham Tuhan Naibata! ibere Ham do bannami masam ni horja, urupi Ham ma hanami manghorjahon ai humbani bujur ni uhur, ulang namin marsaor dousa. Amen.

Haleluya No. 190: 1, 3:

1. Marhorja pe hapeni ganup partidah in
Hape anggo jadini bai Naibata do in
Ibahen milas ari marudan namur pe
Tongtong pasu-pasu-Ni marguru Bai hape
Ganup halayakon ibere Naibata
In pe tenger uhurmu da bai Tuhan Naibata!
3. Tuhanta manjadihon ganup panondang in,
Tuhanta mangaturhon ‘ge hombun, logou pe;
Lao pamalas uhurta, jorgit angkula in,
Ganupan Naibatanta do manumpakkon in.
Ganup halayakon ibere Naibata
In pe tenger uhurmu da bai Tuhan Naibata!

23 Agustus: Panorang panohuan ni Naibata >>

<< 21 Agustus: Sibere-bere na banggal 

tnt160822