“Ai ibotoh hita ihorhon hamarsikon ai do hasabaron”. (Roma 5 : 3)
Pangalaman ni Apostel Paulus do na isuratkon ijon: “Ihorhon hamarsikon do hasabaron”. ldagei ma atap sonaha na marsik. Duantorap ia dokah-dokah tartutup. Limantorap ia ilipati ompat puluh hurang sada, tolu hali ia ibogbogi, santorap ipargijig bani batu, tolu hali harom kapalni, sadari saborngin ia mumbang-umbang i laut. Gati i pardalanan marmara halani bah mardalan pakon panamun, biar dompak bangsani atap dompak sipajuh begu-begu. Marmara i huta, marmara i halimisan, marmara i laut, marmara humbani sanina sipahulah-kulah. Ibagas halojaon pakon hasunsahan sipat-sipat saborngin, laparan mata modom, lohean pakon horahan, gati ibagas puasa, borgohan hiou pe tang dong (2 Kor. 6 : 24-27). Sobali ni ai ope, dong ope na songon duri Ibagas dagingni.
Sonaha do pangkorhon ni sagala sitaronon ai bani Apostel Paulus? Ai do mangkorhon hasabaron bani Apostel ai.
Sonaha do pangkorhon ni sitaronon na roh hu banta? Anggo somal hita manaron, lambin roh tahanni, lambin roh sabarni do hita. Dong do halak na borani mati, tapi na borani hidup age sonaha marsikni seng piga, na so pag hidup ma halak na mandolos.
Hunja do gogoh ni Apostel Paulus manaron haganupan ai? Humbani Naibata do. Torang do iarusi ganup sitarononni, ra do Naibata mambere gogoh bani laho manaron ai. Ibotoh homa torang, holong do atei ni Naibata mangidahsi, seng anjai paturutonni ia mandolei. Bereonni do gogoh manaron haganupan ai. Sagala sitaronon ai mamboan pasu-pasu do ai bani goluh ni haporsayaonni.
Tontu hita pe sihol do songon Apostel ai. Ibotoh do na ipaturut Naibata do togon sitaronon ai bani halani holong ni uhur-Ni laho manopa dirini ase lambin harosuh ni Naibata.
Halani ai unduk janah sabar ma hita manaron sitaronon na pinasogop ni Naibata hu banta janah sai padohor hita bani Naibata ma sagala sitaronon na roh hu banta.
Ham Tuhan Naibata! Ham do manongos sagala sitaronon na roh bannami atap na paturutkon roh bannami. Tapi holong ni uhur-Mu do ai bannami. Sai lambin dohor ma hanami hu Bamu marhitei sitaronon ai. Amen.
Haleluya No. 154: 3,4,7: Marsipota pe Idahon >>
3. Songon pambere ni Bapa do pambere ni Tuhanta,
na marguna dansa tong iberehon banta on.
4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.
7. Asal ma tongtong rupeihu holong atei ni Tuhanku;
‘Ge pe hu tanoman au, sungkup ondos Bani au.
19 Agustus: Pajongjong Pardameian age ….>>
17 Agustus: Pajongjongon ni Naibata do Ham homa >>
tnt190818
Recent Comments