17 Agustus: Pajongjongon ni Naibata do Ham homa”

 

“Anggo mulak uhurmu bani Tang Sigogohan ai, … pajongjongonni do ham homa”. (Job 22:23)

Seng dong na legan, Naibata do hansa na boi pajongjongkon na dob pinarseda ni dousa. Age sonaha daoh ni jolma manadingkon Naibata, anggo mulak uhurni bani Naibata, boi do ibangun (ipajonjong).

Buei do jolma na dob sirang humbani Naibata halani dousa, maseda angkula pakon tonduyni, lang boi be ia sirang humbanidousani, humbani dirini sandiri. Seng dong be uhurni dompak Naibata, seng dong be gogohni hujai, domma gabe jabolon ni dousa ia. Tapi anggo mulak uhurni bani Tang Sigogohan ai janah ipindo partolongan, maluah ma ia humbani dousa ampa sagala pingkiran na jahat. Lobihni ai ope, iguruhon ma humbani Tang Sigogohan ai mantaluhon sagala pagori ni angkulani. Gabe ipatorsa Naibata ma ia use anjaha ipakei gabe pagori-Ni.

Buei do pangalaman ni parmabuk, parjudi, parhangkis, panangko, gabe ipatorsa Naibata use. Itonggohon ma: “Bapa, domma mardousa ahu dompak Ham pakon dompak hasoman jolma. Sasap Ham ma dousangku! Bere Ham ma bangku gogoh laho pasangapkon Ham, laho mandalankon harosuh-Mu”. Anggo humbani bulat ni uhurmu mangindo partolongan humbani Tang Sigogohan ai, laho mantaluhon dousa, ijalo do ham ibagas malas ni uhur. Ibere ma bamu gogoh-Ni, ibere ma goluhmu. Dob mulak anak na magou ondi, seng ipareksa bapani atap na sonaha ia paima mulak. Na porlu bani bapani “mulakni” ai do. Marmalas ni uhur ma ia, marpesta ma sidea.

Sonai do Naibata dompak hita, asal mulak uhurta Bani, malas do uhur-Ni manjalo hita. Sai mulak ma uhurta dompak Naibata. Dob pe hita targompang atap tompas ibagas haporsayaonta, sada do na ipindo Naibata: Mulak namin uhurta mardingat-Si. Anggo sonai targompang pe hita, tompas pe hita itogu do hita ase jongjong use.
Ham Tuhan Naibata! Ham do Tang Sigogohan. Anggo ididah Ham lambin ganggang ahu humba-Mu songgoti Ham ahu, aso mulak uhurhu Bamu. Pajongjong Ham ma ahu use. Amen.

Haleluya No. 111: 1,4: Sai Mulak, Sai Mulak >>

1. Sai mulak, sai mulak na mardagang do ho!
Ai daoh ho nuan, sirang do tuah min.
O pardagang ou! Mulak! Mulak ma ho!
Mulak! Mulak ma ho!
4. Sai mulak, sai mulak, ai na sonang ma ho.
Sahei ma dousamu, dapot pinintamu.
O pardagang ou! Mulak! Mulak ma ho!
Mulak! Mulak ma ho!

18 Agustus: Hasabaron ibagas Sitaronon >>

<< 16 Agustus: Roh do panorang parturiakan banta >>