“Sonaha do ai na hutangar pasal ho? Patidak ma parhiraan ni jinagamu. Ai seng be tarbahen ho gakni sijolom anakkunsi”. (Lukas 16:2)
Seng sai dapot jolma na totap bujur, sihaporsayaan manjaga sijagaon. Mungkahni dear do maratur torsa haganup, gabe porsaya ma tokehni bani. Dob porsaya tokehni bani, lambin maruhur-uhur ma ia, gabe hurang ma horjani, gabe tarbogei bani tokehni hurang ni horjani ai.
Na bani barita on, ihira na laho lopas holi mando ia bahenon ni tokehni, jadi ibahen ma parsiatanni dob lopas holi ia. Pandei ma ia tongon.
Age pe dong na pandei pasal parsiatan i tanoh on, seng piga na pandei pasal parsiatan magira ai, bani goluh ni tonduy ai.
Bani ganup hita roh do panorang parhiraan (parturiakan), partanggungan-jawab. Patidak ham ma parturiakan pasal jinagamu: uhur, hata pakon parlahouta na niondoskon ni Naibata jagaonta. Huja ibere hita uhurta? Aha isahapkon hita? Sonaha do parlahouta? Bani Tuhanta do buenan ibere hita uhurta atap bani dunia on? Aha do ipansahapkon hita, hasangapon ni Naibata do atap hasangapon ni jolma buenan? Sonaha do parlahouta, manogu jolma do dompak Naibata laho pasangap Naibata. atap suhar-suharni ai do?
Panorang na binere ni Naibata banta huja do ipakei hita? Arta na binere ni Naibata banta huja do ipadalan hita? Anggo roh parturiakan sisonai ai banta, tontu iahap hita do buei ni utangta dompak Naibata.
Roh do parturiakan sisonai hu banta anggo ipaturut Naiata roh banta naborit na parah atap sitaronon na parah, atap na mardapot-dapot. Ijai ma roh uhur na mamilangi gabei diri ronsi haganupan hauhuron diri. Gabe taridah ma utang ai, hahurangan ai mardapot-dapot.
Bai parmateita tarpaksa ma tutup parhiraan ai. Paima roh ari ai, roh ma hita hubani Naibata, paima matei, sanggah manggoluh on. Sopotkon hita ma dousanta, pipotta, salahta pakon sagala hahuranganta hubani Naibata. Sai maidop do uhurni ibere do ai halani pangkopkopon ni Tuhan Jesus Kristus banta.
Ham Tuhan Naibata! Urupi Ham ma ahu ase pag ahu marturiak Bamu, ai sagala dousangku domma isasap Tuhan Jesus. Marhiteihon ai pag ma ahu marturiak Bamu. Amen.
Haleluya No. 115 : 1, 2,4, 5: Sadokah Ho i Tanoh On >>
1. Sadokah ho i tanoh on papintor uhurmin
Padingat-dingat ma tongtong nidok ni Tuhanmin
2. Sai songon hayu dear ho ramos parbuahniin
Bulung ni pe tabun homa usihi ma sonin
4. Ambungkon humbai uhurmin na so margagan in
Ganup na humbai Tuhan in ramot ma jaga in
5. Sai tiru Tuhan Jesus in na roh mangkopkop ho
Pambaen-Ni ge hata-Ni in hagoluhanmu do
17 Agustus: “Pajongjongon ni Naibata do Ham homa” >>
<< 15 Agustus: Songon hayu Namasambor?
tnt160816
Recent Comments