24 Oktober: “Anggo ipalumba ho do …. maluah ma hosahmu”

“Anggo ipalumba ho do parjahat hape seng ra ia mulak manadingkon dalanni, matei ibagas hajahatonni ma ia, tapi anggo ho maluah ma hosahmu ibahen ho”.

(Hesekiel 33: 9)

Anggo seng rapat hita hubani Naibata, anggo seng hampit Naibata hita, seng ididah hita hamagoan ni halak parjahat. Ai do homa mambahen lang ipalumba hita. Tapi anggo rapat hita bani Naibata, iahap hita do holongni banta, ai ma patubuh holongta bani parjahat, gabe ra ma hita palumbahon, mamodahi humbani bujur ni uhurta, humbani holongta.

Anggo somal hita sonai, gabe biakta ma ai, hasoman pe iahap ma holongta do ai. Palumbahon pe hita anggo sedo na roh humbani holong iahap hasoman do ai. Parhitean do hansa hita anggo ra manadingkon dalanni Tonduy ni Naibata do marhorja ibagas uhurni, anggo ra ia pasiat hata lumba-lumba ai. Tanggung-jawabmu domma mardalan. Lang tungguon ni Naibata be humbamu pasal ai, maluah ma ham.

Haganupan ai tarpajadi do anggo iakuhon uhurta na dob isuruh Tuhanta do hita mandalankon ai halani holongni na dob jinalonta.

Ase sedo songon galar utang tumang mangkorjahon ai, roh humbani holong do, holong na dob jinalonta humbani Tuhanta na mangkopkop hita.

Pasal on gati do hita marsalah. Age naring ibotoh hita, dong hasoman na laho marjahat, ulang pala sai diri manggorahon, ninta. Sedo namin manggorahon anggo tujuanta palumbahon do.

Sada horja na mahol ai homa. Pindoon ase iparmaloi Naibata hita mandalankon ai, tarlobih anggo sitoraskon atap sisangapkon diri ma sipalumbaon ai. Tapi age pe sonai halani tanggung-jawabta do ai, sai pindahanta do dalan pasaudkon ai.

Anggo domma ipalumba hita hape sidea seng ra surut humbani dalanni ai, maluah ma hita. Salosei ma tanggung-jawabta.

Tonggo

Ham Tuhan Naibata! Lambin patidak Ham ma bangku holongmu, ase lambin holong uhurhu mangidah hasomanku, na mangkorjahon hajahaton ase ra ahu mamodahisi pakon palumbahonsi. Amen.

Doding

Haleluya No. 153: 4, 5: Ondoskon Haganupan

4. Sai tong tenger uhurrnu mardingat Tuhan in;
Lupahon rna uhurmu bai pandoleian in ;
Ai anggo itahankon horu ni uhurmin.
Tarolos do Tuhanta mambuat horumin .

5. Paturut Naibantanta patorsa langkahmin ;
Na pandei do Tuhanta, ganup pasirsir in.
‘Tor sungkod pingkiran-Ni lao paluahkon ho ?
Gogoh-Ni ituduhkon, ase ididah ho.

<< 23 Oktober: ” …humbani tanganmu do tungguonku darohni”

25 Oktober: Tenger ni uhur bani hasasapan ni dousa >>