“Tenger ma uhurmu ambia, domma sasap dousamu”!
(Mateus 9 : 2)
Iboan halak do na oyangon bani Tuhan Jesus. Tapi sedo pitah badanni boritan, na boritan do pakon tonduyni. Naborit oyang ai manunsahisi tapi sunsahan ope ia ibahen naborit ni tonduyni, ai parahan do ai. Mardousa do ia iahap dompak Naibata, ilanggar titah ni Naibata. Sihol uhurni mardamei pakon Naibata. Sihol ia iboan bani Tuhan Jesus, dob das ia ihatahon Jesus ma humbani holongni: “Tenger ma uhurmu ambia, domma sasap dousamu”. Jadi malum ma tonduyni.
Buei do na oyangon na boritan tonduyni, dousani do manunsahisi arian borngin. Boratan ia ibahen dousani. Masihol uhurni bani damei na humbani Naibata, ipindahi ase dong use parsaoran ni tonduyni.
Botoh hita ma Kristus do na boi mangurupi hita ijai, ai margogoh do Ia janah ra do Ia. Ibotoh hita domma matei Tuhan Jesus bani hayu parsilang halani dousanta pakon dousa ni dunia on. Ase age buei age banggal dousamu, seng itulak Tuhan Jesus na roh hu Bani. Roh ma ham bani Tuhan Jesus Sipaluah ai, ase dihut ham maluah. Ase roh ma ham bani Jesus Kristus, ia sonaha pe pardongmu. Turi-turihon ham haganupan hu Bani sagala pusok ni uhurmu, ganup dousamu. Ompaskon ham dirimu hu Bani, tenger ma uhurmu bani Tuhanta. Dobni luaronkonni ma bamu “Tenger ma uhurmu ambia, domma sasap dousamu!” Gabe sonang ma uhurmu. Tompaonni ma uhur nabayu ibagas uhurmu.
Halani ai ulang be pala manrantam ham, roh ma ham bani Tuhan Jesus. Margogoh do Ia mambahen ham gabe pintor janah iahap ham ma mardamei ham pakon Naibata, ijai ma gabe malas uhurmu ai domma salosei ganup dousamu marhitei pangkopkopon ni Tuhan Jesus. Tenger ni uhur bani hasasapan ni dousa na binahen ni ai Tuhan Jesus, in ma bona ni pardamean pakon malas ni uhur.
Tonggo
Ham Tuhan Jesus! Tarima kasih ma Bamu, halani ra do ham manasap dousangku. Urupi Ham ahu ase tenger tumang uhurhu bani idop ni uhur-Mu na mambahen hasasapan ni dousangku. Ase mardamei ahu pakon Bapa in sonai pakon Ham homa. Amen.
Doding
Haleluya No. 150: 2, 3: Lauja do ho na loja in >>
2. Ompaskon pusok uhurmin bai Tuhan Jesus in.
Sai boban ganup dousamin bai Sipagoluh in.
Nai ma tongon, sai roh ma ho!3. Ai Jesus do padamei ho na loja in tongtong;
Ai anggo lang hujin ho roh, manaron ma ho tong.
Halani in, sai roh ma ho.
Recent Comments