23 Oktober: ” …humbani tanganmu do tungguonku darohni”

tnt_23okt

“Anggo ahu mangkatahon bani parjahat: ningon matei do ho ale parjahat! Hape seng martugah-tugah ho palumba parjahat ai, manundalhon dalanni ai, matei do namin parjahat ai ibagas hajahatonni, tapi anggo darohni hun tanganmu do tungguon-Ku”.

(Hesekiel: 33 : 8)

(Ter. baru, 1976: “Anggo huhatahon bani halak parjahat: Maningon matei do ho, ale parjahat tapi seng marsahap ho palumbahon parjahat ai, ase itadingkon dalanni ai, sai na matei do namin parjahat ai ibagas hajahatonni, tapi humbani tanganmu do tungguonku darohni”.)

Hata na iatas on ihatahon Naibata bani nabi Hesekiel, na sinuruh ni Naibata marjaga bangsa Israel.

Hita pe isuruh Naibata do marjaga niombahta, diha-dihanta, sinhutanta, hasoman sakurianta. Ningon palumbaonta sidea ase ulang inunut marjahat. Magou pe sidea ibagas hajahatonni anggo lang ipalumba hita, tungguon ni Naibata do darohni humbagas tanganta.

Somalni ibagas uhurta ipalembang hita do tanggung-jawab ai bani gamot ni kunia, bani pandita, sintua pnl. Sonai homa tanggung-jawah ni Pamarentah, guru-guru pangajari atap tanggang-jawab ni parjahat ai sandiri.

Tongon dong bei do tanggung-jawabni ai, tapi tanggung-jawabta pe dong do: Palumbahon, mamodahi ase ulang itunggu Naibata darohni humbagas tanganmu. Tapi ulang ma namin halani biar bani tanggung-jawab ai hansa tapi na roh humbani holongta na palumba hasomanta, ase surut ia humbani hajahatonni. Tarlobih ma na dumpar tanggung-jawabta, songon orangtua bani niombahni, guru bani muridni, sanina, botou huan-kuan. Ningon bahenonta do dalan ase mulak parjahat humbani hajahatonni.

Balosanta do Naibata magira bani ari paruhuman na banggal ai pasal ai. Holongta do panguntu ni ai, holongta dompak Naibata ampa holongta dompak ondosan banta ai. Idalankon hita ai songon na mangidangi Naibata do hita ijai, lanjar mangkaholongi hasoman jolma.

Ingatonta do pangkopkopon ni Tuhanta Jesus banta, ase malas uhurta mandalankon ai. Ambah ni ai patut do mabiar hita bani hata ai: “Tapi darohni hun tanganmu tungguon-Ku“.

Tonggo

Ham Tuhan Naibata! Pagolpa Ham ma ahu bani tanggung-jawabku. Urupi Ham ahu mandalankon holong na humbamu ai. Amen.

Doding

Haleluya No. 184:1.4: Manjaga ma Hanima >>

1. Manjaga ma hanima na bujur uhur in;
Nahiti suluh nima ai roh ma borngin in.
Na roh ma Siparunjuk bai tunangan-Ni in.
Na tong mangkasiholi Parunjukon-Ni in.

4. Barah ma roh Tuhanta marjaga nasiam;
Tangihon golpa-golpa, na dob ibogei ham!
Melele siang ari, lao ma na golap in;
Dohor ma panorangni, lihar ma ari in.

24 Oktober: “Anggo ipalumba ho do …. maluah ma hosahmu”>>

<< 22 Oktober: “Patotaponni do nasiam das hu ujung