7 April : Mase galek uhurta, janah hurang martarima kasih?

Jadi nini si Maria ma: Ipuji tonduyhu ma Tuhan in, marmegah-megah do tonduyhu mangidahi Naibata Sipaluah ahu.

(Lukas 1: 46- 47)

Iparmuliai anakboru si Maria ai do Tuhan in, halani ipilih ia gabe inang ni Mesias na pinarbagah ai. Marmalas ni uhur do ia bani haluahon na laho roh ai, marhitei Anak ai. Na lohean ipabosur, na sihol bani sibere-bere dapotan ma, gabe roh ma idop ni uhur ni Naibata bani na marsundut-sundut. Malas uhur ni si Maria mangidah hatuahon na laho roh ai.

Sonari hatuahon ai domma roh, malas do uhurta ijai? Imuliahon hita do Tuhan in? Ipuji hita do Ia janah tarima kasih do uhurta?

Boi ma ibalosi hita ai anggo mangkawah hita inggot hita janah mangkawah bani uhurta pakon pargoluhonta. Atap otiktu do tarima kasih ni uhurta, seng sadiha malas ni uhurta.

Mase nani sonai? Ai seng be roh idop ni uhur ni Naibata marsundut-sundut? Ai lang marnunut do idop ni uhur ni Naibata? Mase galek uhurta, janah hurang martarima kasih?

Anggo halani aima na so iparlajari hita mananda dirinta pakon dousanta na buei in, gabe hurang porlu banta Sipaluah. Ra asal ihatahon hita do: Sai maidop do uhur ni Naibata hu banta.

Anggo tongon ni uhurta do mangkatahon ai, na dob ididah hita do hasedaonta pakon hamagoanta, anggo sedo halani roh idop ni uhur ni Naibata. Anggo tangkas iahap hita sambor ni uhurta pakon dousanta na tongtong manlioti hita, anggo tangkas ididah hita banggal ni dousanta ampa hamagoan pangkorhon ni ai, lang tarbahen lang malas uhurta bani Sipaluah sinuruh ni Naibata, janah anggo tangkas ihaporsayai uhurta Sipaluah ai, seng anjai lang marmalas ni uhur do hita mamuji pasangap Sipaluah ai.

Pindoonta ma hubani Naibata, ase talar iarusi hita idop ni uhurni na banggal ai banta.

Tonggo

Ham Tuhan Naibata! Tompa Ham ma uhur na bayu ibagas ahu, na mananda haluahonku na banggal in.

Amen.

Doding

Haleluya No. 5: 3, 5. Hupuji Holong ni Atei-Mu >>

3. Huahap maningon mar-Tuhan, ningon manggoluh au Bamu:
Seng jumpah au be hagoluhan, anggo seng pinasirsirMu:
Sai Ham na baen parsarananku, sai gok Bamu mando langkahku.

5. Ai domma au iparjabolon, sibolis pakon dousangkin.
Diatei ma Ham roh o Tuhan, manaron uhum bangku in-,
Itaron Ham do hamateian, mambahen bangku hagoluhan.

8 April: Akal ni si bolis >>

<< 6 April: Unduk bani sura-sura ni Naibata