29 Oktober: “Porini dong atap ise na mardousa”

“Porini dong atap ise na mardousa, dong do na marmaloi hita bani Bapain, ai ma Jesus Kristus na pintor in. Ia do pardearan pasaloseihon sagala dousanta”.

(1 Johanes 2: 1, 2)

Halak na dob mangguruhon mananda Jesus gabe Sipaluah bani dirini, manlawan do dompak dousa. Mabiar do ia mardousa dompak Naibata, mardingat holong ni Naibata na banggal ai. Sai sihol do irikkon bokas ni na dob matei ai mangkopkopsi. Idingat do hata-Ni na mangkatahon: Anggo holong do uhurnima Bangku idalankon hanima do Titahku. Ipindo do partolongan ni Tonduy na Pansing ase margogoh ai marnalang dirini pakon mangihutkon Tuhan Jesus.

Martorap iahap hita songon na gogohan dousa ai ase hita, janah italuhon hita. Roh ma parlajoan banta, mangkatahon: Seng dong be hasasapan ni dousamu, seng ra be Naibata manasap dousamu. Mambogei ai ra ma sangsi hita mangkatahon: Sonaha do nani tongon? Tapi seng tongon sonai, ipaima Naibata do hita: “Porini dong atap ise na mardousa, dong do na marmaloi hita bani Bapa in, ai ma Jesus Kristus na pintor in. Masuk do la hubani hotak paridop ni uhuran, marhitei sitaronon pakon parmateini mangkopkop hita.

Roh ma hita hu Bani rap pakon dousanta, ase isasap dousanta janah ibere gogoh banta mantaluhon na jahat, halani goran-Ni.

Tapi ulang hampung uhurta mangkorjahon dousa halani bagah-bagah idop ni uhur ai. Seng ipasirsir hasasapan ni dousa bani halak na hampung uhur, manuntuni mardousa mangunsagahon idop ni uhur ai. Tapi atap dong na talu bani parlajoan gabe mardousa ia, hujai ma bagah-bagah na tarsurat iatas on.

Tonggo

Ham Tuhan Jesus Sipaluah hanami, paridop niuhur banggal in. Tarima kasih ma halani partobuson-Mu marhitei sitaronon pakon parmatei-Mu. Tarima kasih ma halani Ham do siholang das bani hotak idop ni uhur ni Naibata, Bapa in. Amen.

Doding

Haleluya No. 118: 2, 3: Tuhan Jesus Siparmahan >>

2. Bai musimni sipangagou, Ham panjaga na gogoh.
Anggo bokas-Mu hu tonggor, sai irikkononku Ham,
Sai irikkononku Ham, sai irikkononku Ham.
Anggo bokas-Mu hutonggor, sai irikkononku Ham.

3. Baen suruhan-Mu ma ahu, ai seng soya hata-Mu.
Janah Ham homa manogu, ganup jolma roh Bamu,
ganup jolma roh Bamu, ganup jolma roh Bamu.
Holong atei-Mu sai togu, ganup jolma roh bamu.

<< 28 Oktober: “Sada Tanda Hamubahon ni Uhur”

30 Oktober: “Sedo nani das na lupa Naibata bangku?” >>