30 Oktober: “Sedo nani das na lupa Naibata bangku?”

Atap ise na porsaya bani seng anjai maporus

(Jesaya 28: 16)

(Terjemahan baru 1976, “Barang ise na porsaya bani, seng anjai tarbador“).

Na porsaya bani Naibata, dong do panorangni paimahon. Porsaya do ia anggo na dob pinarbagah ni Naibata boi do ipasaud. Halani ai anggo na porsaya bani Naibata ipatugah do Bani atap aha haru ni uhurni ampa hasosakanni anjaha ipaima do panorangni Naibata laho mangurupisi. Idingat do hata ni Psalm 31:5: “Ondoskon ma dalanmu bani Jahowa anjaha tenger uhurmu Bani, ase Ia patorsahon

Porini roh sungkun-sungkun ni uhurta mangkatahon: Sedo nani das na hupa Naibata bangku? On ma balosni: Na porsaya Bani seng anjai maporus. Na porsaya ai sabar do paima panorang ni Naibata, pindoonni do gogoh manaron ibagas na sabar. Seng sai mamintor ibalosi Naibata pangidoanta. Porlu ididah hita sabar paima panorang ni Naibata, pindoonni do gogoh manaron ibagas na sabar. Seng sai mamintor ibalosi Naibata pangidoanta.

Porlu do hita ididah sabar paima panorang ni Naibata. Na mangindo do hita, Naibata do na mambere. Jadi panorangni na mambere do sungkunon, sedo panorang ni na mangindo. Dihut do mangajar hita sabar ase ipalambat Naibata pembereni banta. Bagah-bagah niNaibata, maningon isuhuni do. Halani ai patut do tenger tumang uhurta bani Naibata. Ai tujuan ni idop ni uhurni, ase lambin totap do haporsayaonta pakon pangarapanta.

Hutanda sada halak paima Kristen ia, matean anak na gajang, partigonanni do ia. Halani pusok niuhurni sihol mamunuh bani do ia. Pala do ijaga pisou ase ulang dong dapotsi laho mamunuh dirini. Tapi dob porsaya ia, sonai homa matean anak use, tapi legan tumang pangabakni, tangkas songon halak na marpangarapan. Tangkas ibotoh humbani Naibata do roh pusok niuhur, tapi humbani Naibata do roh homa pangapohon. Taridah do bani halak ai sintong ni ayat na iatas in. Na so porsaya ai songon na laho lintun do, songon na laho maporus do tapi dob porsaya lang be tongon maporus. Nanget ma ia maruhur, ididah uhurni ma Naibata, na boi mangapoh uhurni.

Tonggo

Ham Tuhan Naibata! Iparbagah Ham do ra do Ham mangkasomani hanami ibagas hasunsahan. lajari Ham do hanami paimahon pangurupiMu bani panorang tinontu-honmu, ase lambin toguh haporsayaonni, totap totap pangarapannami. Amen.

Doding

Haleluya No. 154 :1-3 Marsipota pe Idahon >>

1. Marsipota pe idahon, hita songon tinadingkon
Ni Tuhanta Bapa in, sedo na tongon sonin

2. ‘Ge malambat pe sipota pangurupi ni Tuhanta,
anggo roh panorangnin, mintor tongoson-Ni in.

3. Songon pambere ni Bapa do pambere ni Tuhanta,
na marguna dansa tong iberehon banta on.

<< 29 Oktober: “Porini dong atap ise na mardousa”

31 Oktober: “Salah ni Naibata do?” >>