“Ai haganup do nasiam anak ni Naibata marhitei haporsayaon bani Kristus Jesus. Ai nasiam sagala na dob tardidi hubagas kristus, domma Kristus ai ipaheion.
(Galatia 3 : 26, 27)
Marhitei pandidion roh do Naibata hu banta ibagas idop ni uhur-Ni ampa holong bapa. “Ai … na tardidi hubagas Kristus, Kristus do iparhiouhon nasiam” (terj baru). Ipakei hita do Tuhan Jesus ijai, ai marhitei Tuhan Jesus, ijalo hita do hasasapan ni dousanta ampa uhur na bayu ai, ai ma sibere-bare ni Tonduy na Pansing. Gabe tubuh ma hita gabe anak ni Naibata janah purrupei bani goluh na sadokah ni dokahni ai.
Ijalo hita do ijai gogoh marporang dousa pakon gogoh mambalosi Naibata. Ipargogohi Tonduy ai ma hita ase lambin margogoh janah magodang ibagas haporsayaon. Ai na porsaya janah tardidi dapotan hagoluhan. Boi ma napangunsagahon pandidionta ai porini roh pe sipanlajou. Seng itadingkon Naibata ahu anakni (boruni). Ai domma iain ahu gabe niombah-Ni ibagas pandidion na pansing ai.
Porini roh pe sipanlajou mangkatahon seng ra Naibata manasap dousamu, on do balosku: “Sasapon ni Naibata do dousangku halani Tuhan Jesus Kristus, ai Ia do Sipaluah ahu, torang do ai bani pandidion na pansing ai. Porini galek pe martorap haporsayaonku hasoman ni Naibata do ahu ronsi roh ajalhu (ajal ni dunia on). Tarbahen au do haganup marhitei Tuhan Jesus na margogohi ahu”.
Pangahap ni Apostel Paulus, dob tardidi hita na songon pahean do, seng talag angkulanta dompak milas pakon borgoh ni ari. Sonai do Tuhanta seng dumpar be hita dompak munsuhta, Tuhanta ma iholang-kolangta dompak munsuh, parlajoan pakon sibolis.
Halani ai lang pala be mabiar hita. Tuhan Jesus ma na songon gantarta dompak munsuhta. Lang be tardos hita. Seng paturuton ni Tuhanta hita mahua. Ramotonkonni do hita humbani sagala pangagou.
Tonggo
Ham Tuhan Naibata! Tarima kasih ma Bamu halani ijalo Ham hanami gabe niombah-Mu ibagas pandidion na pansing in. Urupi Ham ma ahu ase totap ahu Bamu.
Amen.
Doding
Haleluya No. 96 : 3, 5: Seng Au Ompungni Ahu >>
3. Seng au ompungni ahu dob na tardidi au
bai goran ni Tuhanku na marhioui au
mardomu au bai Jesus in rap pakon Kuria-Ni
ginomgoman-Ni in
5. Sai tong hatahononku: “Seng au ompungni au”
Sai Jesus jolomanku paima ondos au
Seng lupa au bai Jesus in ronsi rotap hosahku
Sai sonang au ijin
Recent Comments