16 Juni: Uhur na Iondoskon

“Ho anakku bere ma uhurmu bangku”!

(Podah 23 : 26)

Sonai do hata ni Naibata dompak ganup hita: “Ho anakku, bere ma uhurmu bangku!” Iparsahapkon Naibata hita halani holong ni uhur-Ni banta, songon holong ni uhur ni bapa bani anakni. Sonai do dompak naboru: “Ho borungku, bere ma uhurmu bangku!”

Humbani holong ni Naibata do manluar ai. Sihol bahenonni hita borsih janah pansing. Namin sonon ma balosta: “Tuhan nam ma, andon ma uhurhu ondos Bamu!” Ia lang pe sonai, maruntol ma hita paborsih uhurta ase boi ibalosi janah iidangi hita Naibata. Tapi anggo bulat uhurta mangondoskon ase ituhangi Naibata itompa janah itopa Naibata uhurta, urupan ni Naibata do hita pasal ai.

Tapi sedo asal ipareksa Naibata uhurta, ipindo do ase itulakkon hita hibul hu Bani. Anggo ra ham mamberehon uhurmu hibul bai Naibata ase guru Bani, ase Ia sungkunon pasal panggulmiton ni uhurmu, ijai ma gabe sonang ham, ai harosuh ni Naibata mando idalankon ham, martuah ma ham i tanoh on sonari age magira.

Ase marguru bani haputusan ni uhurta do pasal on, atap na ra hita, mangondoskon uhurta hibul bani Naibata atap lang, mandapot ijai ma pardalan ni goluhta i tanoh on age magira. Tapi sidearan banta ai ma mangondoskon ganup uhurta bani Naibata pakon ganup pingkiranta, sonon ma namin sahapta: Ham Naibata ijon do ahu pakon uhurhu ondos Bamu ma in bulat, bahen Ham ma romban bani harosuh ni uhurmu.

Urang (kuli) do pingkiran pakon angkulanta; uhurta ai do anggo raja ni dirinta. Anggo iondoskon hita ma uhurta ai bani Naibata tulak matah, mandur atap kopala ni ai ma ipatorsa Naibata, gabe torsa ma dalan ni pingkiranta, torsa ma langkah ni pamatangta.

Tonggo

Ham Tuhan Naibata! Dobkon Ham ma horja na dob ipungkah Ham ibagas uhurhu, tuhangi Ham ma uhurhu.

Amen.

Doding

Haleluya No. 5 : 1, 2: Hupuji Holong ni Atei-Mu >>

1. Hupuji holong ni atei-Mu, o Tuhan Jesus Rajangkin
Bamu huondoskon tonduyhu, ai do napinindo Mu in
Huhalupahon ma diringku mamingkir holong ni atei-Mu,

2. Sai ipindahi Ham do ahu, Ham pe huhasiholi do.
Itogu uhurMu uhurhu halani ai hubere do:
lpilih Ham hinan tonduyhu, ai pe hupilih Ham Tuhanku.