Badanku do on, na binerehon mangkopkop hanima, jadi bahen ma sonon bahen pardingatan hu Bangku. Ia panginuman on padan na baru do on marhiteihon darohku na niduruskon mangkopkop hanima.
(Lukas 22: 19, 20)
Dong do halak na marpingkir: Use-use ma marhorja banggal na pansing, malele matei diri. Anggo sonari sonaha ninuhurmu ahu marosuh horjangku, sonai ma. Anggo boritan ma diri ijai ma najalo daroh pakon daging ni Tuhan Jesus, ase masuk diri hu surga.
Lepak do pingkiran na sonai ai. Ai horja banggal na pansing ai porlu bani susian ni Tuhan Jesus na sihol mangidangi Tuhan Jesus. Porlu do ai bani susian na sihol paubah uhur ni. Ingat ma: Anggo seng mubah uhurnima, seng tarbahen hanima masuk hu harajaon ni Naibata. Horja banggal na pansing ai do pagolpa hita pasal galangan hasasapan ni dousanta. Horja banggal na pansing ai ma mambere gogoh pakon patoguhkon haporsayaonta. Ra do dong dousa kasihanmu. Roh ma ham bani Tuhan Jesus ase iurupi ham marhitei dagingni pakon darohni manlawan ai. Horja banggal na pansing ai do mambere gogoh bamu mangimbang parlajouan pakon uhur daging.
Ra ihatahon ham: Malas do namin uhurhu marhorja banggal na pansing, tapi butak ope uhurhu, huahap do seng ope talup ahu dihut. Anggo iahap ham ma sonai, ijai ma ham roh ibagas toruh ni uhur mamboan dousamu bani Tuhan Jesus: Jalo Ham ma ahu Tuhan pardousa banggal on. Jolom Ham ma ahu poltik “Bamu”. Pindo ham ma ase gabe pasu-pasu bamu horja banggal na pansing ai.
Suharni ai: Ulang homa hampung uhurmu mandohori horja banggal na pansing ai, ai na susi janah na pansing do ai, ulang iparlamba-lambahon hita, ulang ham songon na marhuja-huja, ase ulang hona uhum.
Tonggo
Ham Tuhan Jesus! Dihut do ahu ipio gabe susian-Mu manjalo daging pakon darohMu, bahen hasasapan ni dousangku. Sai hujalo ma ai ibagas bulat ni uhur laho patoguh haporsayaonku ampa pagogoh ahu manlawan parlajoan.
Amen.
Doding
Haleluya No. 99:3, 4. Sai Papakis Ho Tonduyhu >>
3.Sai masihol do uhurhu hubani layak-Mu na susi.
Sai na tangis do uhurhu, manna-Mu huhasiholi;
Na horahan do tonduyhu hubani daroh-Mu, o Jesus
Na pinindoni uhurhu saor bai Naibata iatas
4. Malas janah hitir-hitir uhurhon, anggo hupingki
Rsua ni sipanganon na ibagas parpadanan.
Ai na dong tardadap uhur, panagang ni na tarsulur,
Tonduy Na Pansing do hansa pabotohkon in hu banta
Recent Comments