Sagala tinanggalannima i tanoh on, tanggal do ai age i nagoriatas.
(Mateus 18: 18)
Domma ibuhai Tuhan Jesus dalan banta hubani Naibata. Halani ai boi ma hita sandiri roh bani Naibata janah martonggo mangindo hasasapan ni dousanta ibagas goran ni Tuhan Jesus Kristus. Anggo isopotkon hita dousanta, isasap do ai janah ipaborsih do hita humbani sagala hagedukon.
Ase anggo pusok uhurmu ibahen dousamu, boan ham ma ai ibagas pusok ni uhur ampa tonggo hubani Naibata, ra do ia manasap.
Songon na mahol do siat ai hubagas uhurta, ibotoh Tuhan Jesus do hagalekonta ai, on ma patenger uhurta ai ijai, ai ihatahon Tuhanta do: “Sagala tinanggalannima i tanoh on, do ai age i nagoriatas”.
Mangunsagahon hata on do iluarhon pandita banta hata on, sanggah Horja Banggal Na Pansing: “Domma sasap dousamu”, ai ma iluarhot juak-juak ni Naibata. Ningon tenger uhurta pasal ai, ningon porsaya botul hita bani hata ai na dob tanggal dousanta marhitei goran ni Naibata Bapa, Anak pakon Tonduy Na Panding.
Ulang ma iahap hita songon hata ni panita hansa ai banta, tapi Naibata sandiri manluarhon banta marhiteihon pandita ai. Anggo sasap dousanta taram i tanoh on, na sasap ma ai lanjar das hu nagoriatas.
Halani ai porlu do botohonta seng ganup halak na marhorja banggal na pansing manjalo hasasapan ni dousa, pitah na mangakuhon iluarhon Naibata bani hata na maharga ai janah ijalo uhurni hata ai ibagas haporsayaon na gok.
Porluhon hita ma ase ipaluah Naibata hita humbani dousanta sanggah i tanoh on, lanjar sonai ma ilobei ni Naibata.
Tonggo
Ham Tuhan Jesus! Ibotoh Ham do hagalekonnami, urupi Ham ma hanami ase maluah hanami humbani panrahut ni dousa ase gabe rahut hanami bani idop ni uhurMu.
Amen.
Doding
Haleluya No. 128: 3, 6, 8. O Jesus na Pagoluh au >>
3. Anggo domma manosal au halani dousakin,
iipuk daroh-Mu do au anggo hudingat in.
6. Huhatengerhon hata-Mu, ai na sintong do in;
Hudingat bagah-bagah-Mu na so ubahon in.
8. Ihasiholi uhurhin au sol ianan-Mu;
Ai pe urasi tonduyhin, papansing Ham ma au.
Recent Comments