Ai seng ijalo nasiam tonduy jabolon ase mabiar use, tapi tonduy anak do, marhitei ai do hita mardilo Abba, Bapa!
(Roma 8:15)
Na so manjalo Tonduy ni Naibata, mabiar do mandohori Naibata, seng pag. Songon na daoh tumang do holang-kolang ni Naibata pakon jolma. Dong do hatunggungon ni Naibata, ampa aturan-Ni (titah-Ni), mambahen na so tardohori jolma biasa Ia. Dong do holi santorap parturiakan ni Naibata, arti paruhuman-Ni manguhum sagala parlahou (dousa), biar na sonai ai, ai ma biar jabolon.
Na dob manjalo Tonduy ni Naibata, seng be sonai biarni, biar anak mando. Ibotoh, ra do Naibata Bapani ai marholong ni atei bani, ai domma ihira ia niombahni marhitei Jesus Kristus. Halak sisonai ai mabiar do homa bani Naibata, tapi songon biar ni anak dompak namatorasni do, sedo songon biar jabolon dompak tuanni. Biar holong pakon biar malang mando bani dompak Naibata, na marholong ni atei bani. Porini pe tarsor mardousa ia, ibotoh holong do tong uhur ni Naibata bani, seng mabiar ia roh mamboan dousani ai. Isopotkon ma dousani janah marjora-jora ia. Jadi isasap Naibata ma dousani halani holong ni atei-Ni. Dong pe pusok ni uhurni banggalan do malas ni uhurni dompak Naibata, Bapani.
Ganup niombah ni Naibata, ibotoh do sihoruonkon dousa. Tapi ibotoh do mamboan ai bani Bapani janah ibotoh marontou do uhur ni Naibata dompaksi, halani na dob ihopkop Tuhan Jesus ia.
Pangahapan haanakon ai ma sada na porlu bani ganup halak Kristen. Romban bani pangahapan ai do rapatni bani Naibata. Sai ibere Naibata ma banta Tonduy anak ai, ase lambin sangkan pangahapta dompak Naibata. Anak ampa boru ni Naibata do hita. Ase na situan ampa na sipanak boru surga do hita. Legan do hita ase anak dunia on. Botoh ham ma ai bani hauhuronmu, bani parsahapmu pakon bani parlahoumu. Ase songon paruhuron ni tuan ampa panak-boru surga hita. Ia ija pe ham marsaor, ase ulang tarringkad holi Bapanta ai halani hita.
Tonggo
Ham Tuhan Naibata, Bapanami, Bapanami na sangkan do Ham. Lambin marhorja ma Tonduy-Mu ibagas uhurhu, ase lambin sah iahap hanami niombah-Mu na botul do hanami.
Amen.
Doding
Haleluya No. 84:1 – 3: Ale Tuhan Bapanami >>
1. Ale Tuhan Bapa nami na marholong atei in.
Suruh Ham ma hu bannami Tonduy-Mu Na Pansing in.
Ham pabayu tonduyhin jadi rumah-Mu ma in.
Tangar Ham pangindoanku holong atei-Mu hu bangku.
2. Lang adong hagoluhanku anggo seng roh Tonduy-Mu,
marianan bai uhurhu ase tong margogoh au.
Mandalankon hata-Mu manghormati goran-Mu;
Ai tongtong golap uhurhu Ham hansa palihar ahu.
3. Ai hunja ma tandaonku Ham, o Jesus Tuhankin?
Tor ija ma akuonku: Ham do hagoluhankin,
anggo seng roh Tonduy in paliharhon uhurhin?
Ai pe Ham ma marsuruhsi ase roh bangku hata-Ni.
12 Agustus: “Masuki ma horbangan na sompit in”
<< 10 Agustus: Goluh na Lambin Romban Bani Rosuh ni Naibata
tnt160811
Recent Comments