1 Agustus: Mangimbang Ladung

“Tapi eak ningon anggo eak, lang ningon anggo lang.”

(Jakobus 5 :12)

“Hatahon nasiam ma: “Eak” anggo eak ma, atap “Lang,” (Terj baru) Bani pamangan ni Tuhanta Jesus, seng dong dapot ladung. Dearni ai namin ambit dapot ma sonai bani hita halak Kristen na mangihutkon Tuhan Jesus. Ai lang buei ididah hita suhar-suharni ai dapot bani hita halak Kristen? Ai lang buei sahap ni hita Kristen na so tarparidani, na so ihunduli sahapni? Domma tenger uhur ni na mambogei, hape seng isuhuni. Gati do gabe mahiri goran ni Tuhan Jesus halani ladung ni hita Kristen. Gati ma ibogei hita hata sonari on: “Beres ma ai!” Hape napandapoti aha pe lang na beres.

Laho mangkatahon “eak” hita atap mangkatahon “lang” maningon tangkas do pingkiron atap boi do nahunduli hata ai, dob ai pe ase naluarhon. Tali do manangkut pinahan, tapi hatani do manangkut jolma. Anggo marpeletan do hatanta humbani na sasintongni, sadalanan ope hita pakon bapa ni parladung ai (Joh, 8:44) sibolis ai, anak ni parladung ai ope hita. Tapi ai lang haganup do hita mangkatahon: “Ham Bapanami na i nagoriatas!” dompak Naibata parsintong ai.

Jadi dob porsaya hita bani Naibata parsintong ai, ningon sintong ma namin hatanta, ulang be hita marladung. Sanggah danak hita sintong do hatanta, tapi dob lambin mangapiti diri hita ijai ma roh ladung ai, ase tunggung hita ninuhurta. Tapi dob ipungkah hita marladung, lambin lang be dong na porsaya banta. Ase hita do marsuruh ulang porsaya halak banta marhitei ladungta.

Maningon maruntol do hita mangimbang ladungta. Ningon pindoonta do gogoh humbani Naibata, ase ipargogohi hita marhata sintong, age rugi hita. Harganan do hasintongan ase arta.

Jagaonta do age ladung hasomalan, ai seng piga hali sintong age aha isungkun halak banta pasal artanta. Anak pakon boru ma hansa na so iporsou hita hinan, na matei pe natugah do.

Tonggo

Ham Tuhan Jesus! Urupi Ham ma ahu marhata sintong.

Amen.

Doding

Haleluya No. 122 : 4: Na Martuah Nini Jesus >>

4. Barang ise na horahan bani hapintoron in,
na martuah do sidea, ai tongon do jumpah in.
Sai na sonang uhur ni na marhapintoron in.

2 Agustus: On do hasonangan bani goluh on >>