“Ise ma nasiam na mabiar mangidah Jahowa, na manangihon hata ni juak-juakni na mardalan bani na golap, anjaha seng dong haliharon bani? Ihatengerhon ma goran ni Jahowa anjaha mangunsandei bani Naibata”. (Jesaya 50:10)
(“Ise humbannima na mabiar mangidah Jahowa, itangihon ma hata ni juak-juakni; ise na mardalan bani na golap, anjaha seng dong haliharon bani, ihatengerhon ma goran ni Jahowa, anjaha marpangajaman ma ia bani Naibatani.”, LAI 1976).
Age pe ihabiari ham Naibata anjaha itangihon ham hatani, ra do martorap mardalan bani na golap ham, seng dong na lihar ibagas uhurmu. Ididah ham do namin Kristus Sipaluah ham janah marmalas ni uhur do ham manjalo hasasapan ni dousa pinasirsirni ai. Tapi martorap ra do roh sungkun-sungkun bamu: Ra do nani Tuhan Jesus mamakei ahu na sonon? Maidop ope uhurni mangidah ahu? Atap na dob isasap do goranku humbani buku hagoluhan ai?
Sanggah sonai mardalan bani na golap do hita. Tapi dong do haliharon. Martonggo ma ham bani Naibata, ase iusir na golap ai humbamu anjaha ibere haliharon holong-Ni ai hu bamu. Ingat ham ma aha na binahen ni Jesus bamu, pingkiri ham ma sitaronon ronsi parmateini. Hatahon ham ma bani dirimu: Sonon do parholong ni atei ni Naibata bangku, pala do Anakni sisada-sada ai iberehon ase ulang magou ahu na porsaya Bani ase dapot ahu hagoluhan na sadokah ni dokahni.
Sonai ma hape holong ni uhur-Ni, iberehon Anakni sisada-sada ai hu hamatean halani ahu, manggalar utang dousangku. Ai ma hata ni Naibata, jaloonku ma hatani ai, ai sintong do ganup hata ni Tuhan ganup kababah, sai porsaya ma ahu. Tongon do galek do haporsayaonku, ibotoh Ham do ai. Urupi Ham ma ahu ase lambin toguh haporsayaonku bani holongmu na ibagas Jesus Kristus.
Pingkiri ham ma holong ni Kristus bamu, sai paliharon-Ni do na golap na ibagas uhurmu ai, mangihutkon panorang tinontuhon-Ni. Mangunsandei bani Naibata ma ham. Manangihon hata ni juak-juakni, ai ma sagala nabi ampa apostel janah mangkaporsayai hata ni Naibata. Seng paturuton ni Naibata hita mardalan bani na golap. Porlu tenger tumang uhurta bani Naibata pasal ai.
Ham Tuhan Naibata! Paahapkon ham ma bannami holong ni atei-Mu bani dunia on pakon bannami. Sondangkon Ham ma sinalsal ni bohi-Mu bannami ase lihar hanami. Amen.
Haleluya No. 335: 5-7: Pusok Uhurmin >>
5. Manaron pe ham, sai tahan ma ham, na sonang ma ham ibaen Jesus
6. Basar Tuhanmin, lamlam hata-Niin, mambere hu bam hasonangan
7. Parrupei do ham, bai ujung ni in, hu hasonangan na i surga
1 Oktober: Ganup do manumpak bani ni madear >>
<< 29 September: : Malas ni Uhur na Marianian
tnt016930
Recent Comments