15 Agustus: Songon Hayu na Masambor?

 

“Seng boi hayu na madear marbuahkon na masambor,” (Mateus 7: 18)

Tontu majangin iahap hita hata on, ai buei tumang buah na masambor bani goluhta. Ingat manggila hita, gati manukas na masambor pasal hasoman ibagas uhurta. Subil dong, latei dong, simburu dong ibagas uhurta ampa pambahenan na jahat.

Bani pambahenanta dompak hasoman, ra do songon na mangalasi mambahen dousa parlahouta, seng boi bahen usihan bani na madear, gati ididah halak banta uhur na manrugihon hasoman.

Mangidah ai manungkun ma uhurta ibagas: Hayu na masambar do nani ahu? Ai lang domma ipungkah Tonduy na Pansing horjani ibagas uhurta pakon bani goluhta. Pusok do uhurta, ai gati do itundalhon hita Naibata. Gati do namin songon na gara ibagas uhurta sihol mambahen na madear, tapi gabe na sambor do gati horjanta. Gati do homa ipindo hita gogoh humbani Naibata ase ibere banta gogoh mangkorjahon na madear, tapi tarida gabe na masambor (hagigi ni Naibata) do ihorjahon hita.

Gati do ianju Naibata hita anjaha isasap dousanta janah ijalo hita mulak gabe niombahni. Iahap hita do ai.

Halani ai ipingkiri hita do ase ulang dong na jahat banta. Jadi marhitei idop ni uhur ni Naibata, sai ihutonkonta ma Tuhanta Jesus, rapat ma hita hu Bani marhitei Tonduy na Pansing pakon hata ni Naibata ampa tonggonta, ai ma mambobai hita hubani dalan hasintongan.

Ididah (Naibata) do uhur na jahat anggo dong banta, tapi ra do Ia mangurupi hita mangimbang na jahat ai ampa mambere pargoluhon na baru. Lambin marianan ma Tonduyni banta, lambin tambah ma haporsayonta. Ibere ma gogoh banta manjolom Tuhanta Sipaluah hita. Dobni gabe hayu na madear ma hita. Idingat hita ma hata bagah-bagah ni Tuhanta na mangkathon: “Ahu do mamilih hanima anjaha hutotapkon hanima ase marbuah anjaha totap buahnima“. (Joh. 15:16) Ningon marbuah na madear do hita itotapkon Tuhanta.

 

Ham Tuhan Jesus! Padear Ham. ma goluhku marhitei Tonduymu, ase ulang be marbuah na buruton ahu, tapi marbuah na madear ma, buah harosuhmu. Amen.

Haleluya No. 50 : 1, 2, 5: Sai na Margantih Tahun on >>

1. Sai na margantih tahun on sonin rosi magira
Jesus baen ham uhurhon ase tongtong marhira
Bai parsurutni ajalhin, janah manimbang ujungnin.
2. Iudut Ham do hosahkin paidah-idah ahu,
Atap na dong do buah ni horja-Mu in hu bangku;
Hape gati hiranan Ham: Buah ni in seng jumpah Ham
5. O Jesus, au urupi ma bai tahun on mamboan,
Buah na ramos, na tama, padaoh ma hamagouan,
Sai Ham pagogoh au tongtong, pasangap Ham bai goluhkon.

16 Agustus: Roh do Panorang Partuarikan banta >>

<< 14 Agustus: On ma dasar ni sosial sibagasan

tnt160815