“Sagala na pinindo ni uhurnima bahenon ni halak hu bennima, ai ma bahen hanima bani sidea, ai sonai do hata ni titah pakon nabi-nabi”. (Mateus 7:12)
Hata in ma paraturan ni goluh ibagas parsaoran na madear i tanoh on pakon hasoman jolma. Artini: Bahenonku ma hubani hasoman songon pinindo ni uhurhu bahenonni bangku. Porini dong hata ni halak na jungkar banta, baloskon hita ma hata na lamlam, sasaponta ma ai humbagas uhurta, marhitei hata na basar. Anggo dong na jahat ibahen hasoman, ningon halupaonkonta ai.
Ningon tarahap do ai bani hasoman ibagas pargoluhonta ari-ari. Buei na nirambang ni ai. Porini i pardalanan ham, porlu namin basar balak manisei ham ronsi patorsa parbornginanmu, atene? Anggo sonari sisei ham janah sarihon ham ma halak pardalan-dalan na songon Iangkahmu ai. Anggo sosak ham tontu porlu do ase dong na martolong ham, anggo sonai, tolongi ham na sosak, bere ham na hurangan.
Marosuh do ham bani hata na lamlam, tene? Anggo sonai lamlam ma hatamu dompak hasoman. Tuhan Jesus do na mamodahkon ai bani susianni pakon banta, anggo sonai pindo hita ma gogoh ase boi hita mandalankon nirambang ni hatani ai.
Tongon mahol do ai, tapi ra do Tuhanta mambere gogoh banta laho mandalankon podahni ai. On ma dasar ni sosial sibagasan. Ambit ra dunia on mandalankon on, halak dompak halak, bangsa dompak bangsa, negara dompak negara, aman janah mardamei do dunia on.
Anggo seng marosuh hita ijajah ulang ma hita ra manjajah. Ambit ra ma dunia manangihon podah ni Tuhan Jesus, mardame do dunia on.
Tontu malas uhurmu anggo itonggobon hasoman ham. Anggo sonai tonggohon ham ma homa hasoman ai.
Ham Tuhan Jesus! Pargogohi Ham ma ahu ase boi hudalankon bani hasoman pinindo ni uhurhu bahenonni bangku. Amen.
Haleluya No. 194: Sai Sihol Usihanku >>
1. Sai sihol usihanku ham Jesus Tuhankin
Bai toruh ni uhur-Mu lamlam ni Hata-Mu.
Sonaha bahenonku lao mandalankon in
Sai ham ma alo Tuhan manolong ai ijin.
2. Sai sihol usihanku Ham Jesus Tuhankin.
Ganupan ningon saud Titahni bapa in.
Sonaha bahenonku lao mandalankon in
Anggo lang Tuhanku manolong au ijin.
3. Sonaha bahenonku maniru Tuhankin
Gok dousa do uhurhu age angkulangkin.
Urupi au, o Jesus sai sasap dousangkin.
Suanhon bai uhurhu holong ni atei-Mu.
15 Agustus: Songon Hayu na Masambor? >>
<< 13 Agustus: “Tuk do kuasa ni Naibata pasaudkon bagah-bagah-Ni”
tnt160814
Recent Comments