“Na puji ma Naibata ni si Sadrak, si Mesek pakon si Abednego, na marsuruh malekatni paluahkon juak-juakni na martenger ni uhur bani”. (Daniel 3: 28)
Ibasa hita do bani Bibel, gati do isuruh Naibata malekat-Ni mandalankon parehtah-Ni, janah idalankon do ai romban bani harosuh ni Naibata. Seng ongga isungkun mase hanami isuruh mase lang na legan?
Hita pe ra do ipakei Naibata gabe suruhan-Ni mandalankon harosuh-Ni. Isuruh namatoras do niombahni mandalankon sihorjaonkonni. Malas ma uhurta mandalankon ai, ai sedo pitah mambalosi namatoras hita ijai, ijai do hita homa mambalosi Naibata. Pindah-pindah do na tading maetek: ambit dong ma namin bapa ondi, ambit dong ma namin inang ondi marsuruh, halani ai malas ma uhurmu mambalosi orangtuamu sanggah manggoluh ope. Roh do holi panorangni lang be isuruh ham.
Mangkawah ma hita lobei bani anak na janglas na lambin buei i tongah-tongahta. Ija do lepak ni on? Bani orangtua do? Bani guru do? Bani masyarakat do?
Rap hahurangan ni ganup do na masa in. Seng dong na maluah humbani tanggung-jawabni pasal in. Tapi na porlu onjolonkonku ijon, janah sibuenan ai ma hahurangan ni hita orangtua. Dokahan do rapkon hita dakdanakta in. Pasomal-somal hita marsuruh dakdanak in marhorja, girah humbani etek-etekon nari. Sedo holong ni atei bani dakdanak ai, anggo lang marhorja sidea nabahen, tapi na marsedahon dakdanak ai do ai use.
Maningon pasomalon do ase malas uhur ni dakdanak mandalankon suruh ni bapa pakon inangni. Anggo lang bahaya ma dob banggal ia. Dob banggal ia sihol mantin ma panganon, borsih pakean janah jenges, hape marhorja lang maringgas, gabe panangko mando ai, pancopet, panipu, pambongkar pakon hajahaton na legan.
Banggalan do tanggung-jawab ni orangtua pasal on. Tongon dihut do guru pakon masyarakat martanggung-jawab ijai. “Na so marhorja ulang ma ia mangan” (2 Tes. 3 : 10).
Tarima kasih Tuhan! Dihut do hanami suruhanMu. Ulang Ham ma hanami pasaudkon uhurmu. Amen.
Haleluya No. 107 : 3, 5: Irikkon Nasiam ma Au
3. Hupatuduhkon dalan in, sisimbilonkonnima,
Ganup geduk ni uhurrnin sipaubahon nima;
‘Se tong pansing ma tonduymin, ronsi rotap ni hosahmin.
5. Seng na tarbaen hanami in, ipingkir uhurnima;
Ulang mabiar halanin, Au do hasomannima.
taluhonon-Ku munsuh in, tenger uhurmu pasal in.
24 September: Dua parlahou na porlu >>
<< 22 September: “…sedo Jahowa ipindahi, rahanan do panambari”
tnt160923
Recent Comments