21 Juni: Pilihan Siayakononta

“Jadi hun nagoritoruh in mangkawah ma ia hu nagoriatas, sanggah bani na parngit in ia anjaha si Lasarus i abingan-Ni”. (Lukas 16: 23)

Barita tudosan ai dong sada na bayak nornor parpahean na manjenges, ari-ari marpesta-pesta marmalas ni uhur dobni matei ma ia janah itanom.

Dong homa sada halak na madoyuk, na margoran si Lasarus. Tibal-tibal do ia boritan i lambung labah ni na bayak ai. la pe matei homa. Tapi roh ma malekat ni Naibata mangalopsi mamboansi hu hamuliaon ni nagoriatas. Hamatean roh bei do bani sidea haduasi. Na sada laho hu pardamean pakon malas ni uhur, na sada hubani hamarsikon.

Marhiteihon tudosan on songon na ipapilihkon Tuhan Jesus banta siayakanta, damei ampa malas ni uhur, goluh i lambung ni Naibata, atap hamarsikon na sadokah ni dokahni.
Ulang da hita namin bani ianan na marsik ai ninuhur ni Tuhan Jesus, ai do ase itaronion marsik janah matei tarsilang na so ingkat ase ulang magou hita. Tapi hu hagoluhan na sadokah ni dokahni hita. Ase maluah hita humbani dousa.

Dear do age bayak nornor halak Kristen, anggo ibere Naibata bani habayakon. Na bayak on gap marpesta-pesta do ia, lang dong panorangni marpardomuan pakon Naibata. Ai ma bahaya ni sibuei arta ampa sibuei usaha, lanjar ilulua artani ai do ia. Bani artani ai do ia mardomu sedo bani Naibata. Lang dong panorangni dompak ugama be.

Sedo homa ganup na masombuh masuk hu surga. Tapi na masombuh maningon sombuhni ai do mambahen rapat ia bani Naibata. Ai do. Ai buei na masombuh gabe seng iparduli Naibata, sisonai seng masuk ai hu surga.

Ham Tuhan Naibata! Bere Ham ma TonduyMu bannami, ase malas uhurnami bani ari paruhumanMu. Amen.

Haleluya No. 183: 1,4: Ari na So Maringgan in 

1. Ari na so maringgan in sai songon longgur sorani
aloling nin hubangku.
Songon tiniham uhurhin bai podang na dob marot in
huja ma ahu laho?
Sai hitir-hitir uhurhin anggo hupingkir parrohmin.
4. O Naibata, pintor do Ham, parjahat in idabuh Ham
Bai apuy na so miloh.
Pondok do pardousaon in, hapeni anggo uhum in,
Lanjar do in mangodoh;
O jolma, ingat in tongtong sadokah na manggoluh ho.

tnt0621

22

: Dalan hu Haraj