“Jongjong ma ho jojang: ai hupatidak pe Diringku bam, manotapkon ho do gabe juak-juak pakon saksi pasal na dob niidahmu Ahu pakon na laho patidakon-Ku bam use”. (Lah. 26:16)
Hata in ma iluarhon Tuhan Jesus dompak si Saul halak Tarsus in, na marburu halak Kristen, Kuria ni Naibata. Hape ia do na ipilih Tuhan Jesus use gabe juak-juak-Ni mamboan Ambilan na Madear bani sipajuh begu-begu.
I pudi ni ari iluarhon Apostel Paulus do, ia do sada pardousa sibanggalan na ipakei Tuhan Jesus use gabe juak-juakni. Gabe igoki tarima kasih ma uhurni janah marhorja lobih humbani hasomanni apostel ibagas horja ni Kristus.
Na masa ai ma gabe pangapoh banta. Na ra do Naibata, mamakei hita gabe juak-juakni. Anggo idingat hita dousanta ampa lanseita dompak Naibata, seng anjai boi be hita pakeon bani tujuan ni Naibata. Tapi seng sonai. Anggo ra Tuhan Jesus mamakei si Paulus na dob marburu Kuria ni Naibata, ra do Tuhanta mamakei hita, halani holong ni ateini. Ase hita na mangidangi dousa hinan, boi do ibahen gabe siidangi Kristus use.
Pindoonta ma bani Naibata Sipargogoh, ase sonai homa hita. Ipatidak Naibata ma banta Jesus Sipaluah dunia on. Ipabotohkon ma banta sagala horja-Ni pakon hamuliaon-Ni mangkopkop hita. Sai iahap hita ma holong ni atei ni Naibata banta marhitei Kristus. Ase ulang be inunut hita mardousa, tapi mambalosi (mangidangi) Naibata ma. Sonai do Apostel Paulus mambahen lang marnaloja, tapi tong do ia ibagas hinsah ni uhur mangambilankon Ambilan na Madear in, ai ibotoh torang hagogohon ni Naibata do Ambilan na Madear in pagoluhkon na porsaya.
Na porlu tumang banta: Ase itanda hita torang Tuhan Jesus pakon tujuanni, romban hujai ma hita boi manaksihon Tuhanta.
Ham Tuhan Jesus! Patuduhkon Ham ma bannami hatuahon-Mu. Urupi Ham ma hanami ase dihut hanami gabe saksimu, songon Apostel Paulus. Amen.
Haleluya No. 120 :1.6: Sai Hinsah Sai Gogoh >>
1. Sai hinsah, sai gogoh, sai hinsah mardalan ho.
Sion hu nagori atas, tongkin pe ho ulang soh.
Suluhmin baen marsinalsal! Bai na lihar in mardalan ho.
Sai hinsah, sai gogoh.
6. Pakei ma, pakei ma, pakei gogohmin ganup.
Patidakkon na marholong, uhurmin bai Jesus in.
Na marsinta ho, o Sion, mangirikkon ganup Hata in.
Pakei ma, gogohmin.
tnt160725
Recent Comments