Bani musim sabion huhatahon pe bani sipanabi: patumpu lobei simaromei-omei, rahuti sasamborkos ase ipuruni. Tapi omei ai patumpu hubagas tuanganku. (Mateus 13: 30b)
Mangihutkon limbaga ai, sada humbani na dua on do hita, omei atap simaromei-omei. Seng boi hita bani sada panorang anak ni sibolis janah anak ni Naibanta. Buei do halak na dob tardidi sihol Kristen na botul ia, tapi inunut do tong mandalankon dousa, ni uhurni masuk ma ia hubani omei sipatumpuon hubani tuangan ni Naibata.
Tapi seng tarotootoi Naibata, ididah do das hubagas uhur. Ididah do atap na dong haporsayaonta bani silang ni Kristus Jesus. Janah ipindo do ase taridah ai bani pambalosinta bani Naibata ibagas pargoluhonta ari-ari mangihutkon Tuhan Jesus. Anggo ididah haporsayaonta pakon pambalosionta ai masuk ma hita bani sipagoluhon (omei) ai, tapi anggo lang ipadaoh ma hita hun lobei-Ni.
Sonaha domma jumpah haporsayaon pakon pambalosion ai banta? Pambalosi do hita bani hata pakon Tonduy ni Naibata? Domma tenger tumang uhurmu bani Naibata? Domma ijalo ham gogoh humbani Naibata ase lambin tambah gogohmu ampa holongmu hu Bani? Ase lambin margogoh ham manlawan dousa?
Pungkah ham ma mampongutkon parugamaonmu, pungkah ham ma mangkaporsayai pakon mangkaholongi Naibata. Pasu-pasu banggal ma ai bani goluhmu sonari age magira. Iahap ham do omei ai pakon simaromei-omei ai tubuh ibagas uhurmu. Totap ma ham porsaya bani Naibata. Tonduyni ma simada janah raja ni uhurmu, sonai age pingkiran pakon haganup parlahoumu ronsi haganup horjamu ibagas goluhmu. Roh ma ham bani Tuhanta mamboan hadirionmu, tapi ningon ra ham itopa, itompa tonduy na baru bamu.
Ham Tuhan Naibata, ajari Ham ma ahu mananda diringku pakon pargoluhonku. Maidop ma Ham sai hudidah ma bohiMu. Amen.
Haleluya No. 148: 2, 5. Layak do Ham Mambere Au >>
2. Pardousa na banggal do au, pansing do anggo Ham ;
Sai bai na dorsa laho au bai na jahat naman .
5. Ai domma pala matei Ham, mangkopkop tonduyhin;
Sihol ma au mangidah Ham, hu lambung-Mu ijin.
Recent Comments