“Tarima kasih ma huhatahon bamu Naibata, halani lang dos ahu pakon halak na legan”. (Luk. 18 :11)
Ai ma tonggo ni Parisei patidakkon hasurunganni, janah apas uhurni bani sijalo sohei na rap roh hu rumah panumbahan martonggo.
Ham sonaha do uhurmu anggo ididah ham mardousa hasomanmu? Mapas do ham? Hasurunganmu do idingat ham? Atap ipindouhon ham do homa bani Naibata ase isasap Naibata homa dousani? Ase mulak ia namin Bani.
Idingat ham do dousamu homa, age pe lang dos rumang ni dousamu ampa dousani? Iahap ham do dousa pakon hagalekonmu janah ra do ham mangindo gogoh humbani Naibata ase ipargogohi ham manlawan sagala humbani parlajoan?
Parisei ai seng sonai tonggoni. Jongjong do ia, bani rumah panumbahan ai mangkatahon tarima kasih bani Naibata halani lang dos ia pakon halak na legan.
Hasurunganni do idingat marimbang na legan. Ase dirini do ipuji, sedo Naibata. Ipatugah seng ongga ia manangko atap marbangkis.
Tapi Naibata sedo pardarat ai ididah, ididah torus hubagas uhur, ididah do ronsi panggulmit ni pingkiran ni jolma.
Sonaha seng gendo dong songon pingkiran ni Parisei ai banta? Ai lang gati do lupa hita mardingat hapintoron ni na legan hasoman Kristen? Ai lang gati do seng sabar hita bani hata apas-apas atap risa-risa ni na legan banta janah seng isasap hita humbagas uhurta. Ai lang gati do ibilangi hita hahurangan ni na legan? Ai lang ai ma namin hiteita manonggor hahuranganta?
Hita pe hape sedo na maluah humbani dousa songon hasoman ai. Ia lang pe itonggohon hita sonai tapi tonduy na sonai ai dong do ibagas uhurta: Seng dos ahu pakon sianu.
Sai iurupi Naibata ma hita ase itanda hita hahuranganta, itanda hita dirinta na sasintongni. Botoh hita ma, na galek do hita janah gok dousa, porlu dapot hita hasasapanni humbani Naibata.
Ham Tuhan Naibata! Urupi Ham ma hanami, ai seng marhasurungan hanami marimbang hasoman. Ramotkon Ham ma hanami humbani gijang ni uhur. Amen.
Haleluya No. 150 :1-3: Lauja do Ho na Loja in >>
1. Lauja do ho, naloja in, binaen ni dousamin?
Seng jumpah ho na sonang in, i parlajanganmin
halani in, sai mulak ho!
2. Ompaskon pusok uhurmin bai Tuhan Jesus in.
Sai boban ganup dousamin bai Sipagoluh in.
Nai ma tongon, sai roh ma ho!
3. Ai Jesus do padamei ho na loja in tongtong;
Ai anggo lang hujin ho roh, manaron ma ho tong.
Halani in, sai roh ma ho.
31 Agustus: Aha ma na tarbahen au bani Sipaluah ahu? >>
<< 29 Agustus: Hapintoron-Ni gabe Hapintoranku
tnt0830
Recent Comments