31 Agustus: Aha ma na tarbahen au bani Sipaluah ahu?

“Laho ma ho ambia marhorja hu pohon anggurta sadari on”!

(Mateus 21: 28)

Pohon anggur ni Naibata, limbaga do ai. Artini: harajaon ni Naibata, Kuria ni Tuhan Jesus. Ganup na porsaya janah na marholong ni uhur bani Tuhan Jesus, malas do uhurni manjalo parentah ai, ase marhorja hu pohon anggur ni Naibata, ase marhorja ibagas harajao-Ni, ase marhorja ibagas Kuriani.

Ra manungkun uhurmu sonon: Aha ma na tarbahen ahu bani Sipaluah ahu. Aha ma na tarbaben ahu i kuria ni Tuhan Jesus? Ai seng dong pambotohku seng dong na dong bangku.

Ulang pala sonai nimu. Boi do ibahen ham atap aha bani Kristus. Marosuh do Ia anggo roh ham marhorja hu pohon anggur-Ni. Sonaha ma parhorjamu? Na marhorja ibagas harajaon-Ni do ham anggo ipatorsa ham horjamu halani goran-Ni janah bahen hamuliaon-Ni.

Tapi ra do lape sonang uhurmu ham balos ai, sihol bahenonmu sada horja na banggal bani Tuhanta. Laho mambahen horja ma banggal bani Tuhan Jesus, pungkahon do ai humbani horja na etek, naija ma na sanggup ham ibagas haporsayaon: Mambasa hata ni Naibata, mantonggohon Kuria pakon parhorja ni kuria, mangarahkon na legan hu gareja, pnl. Buei ope na boi bahenonmu bani Tuhan Jesus: Mangurupi halak na tarsosak, mamboan sinalsal ni haporsayaonmu bani na mardalan bani na golap. Marosuh do Tuhanta anggo itiru hita Ia. Bere ham ma panorangmu manonggor na boritan i rumahni atap i rumah sakit pe. Pakei ham ma panorangmu mambasa pakon mambogei (manangihon) hata ni Naibata pakon martonggo, mantonggohon hasoman ampa kuria in.

Na porlu bamu: Asal ra janah malas uhurhu manangar ojur-ojur ni Naibata marhorja i pohon anggur-Ni, sai dong do dalan. Janah dear do pindoonmu, ase ipatuduh Naibata naija na boi horjaonkonmu ibagas Harajaon-Ni. Sai dapot ham do ai.

Tonggo

Ham Tuhan Jesus! Tarima kasih ma ahu bamu, halani boi ahu pardousa on dihut mangidangi Ham ibagas Harajaonmu ari-ari. Amen.

Doding

Haleluya No. 143 : 2, 4 : O Tonduy na Manggoki Uhur >>

2 . Andohar apuy-Mu ma gara, marlintun bani bangsa haganup,
Jahowa, Ham paingkat halak na bujur mangkatahon hata-Mu,
Kawahkon Ham bolag sabion in, jabolon-Mu seng piga ope in.

4. Antong buei baen Ham suruhan, na sai tongtong igoki Tonduy-Mu.
Janah na ringgas marambilan manogu halak hu gomgoman-Mu,
Taluhon Ham sibolis in tongtong ramoti hata-Mu i tanoh on.

1 September: Horjangku bani Pohon Anggur ni Tuhan >>

<< 30 Agustus: Gijang ni Uhur: Seng Dos Au pakon Sianu