1 September: Horjangku bani Pohon Anggur ni Tuhan

tnt_sep01

“Laho ma ho ambia marhorja hu pohon angourta sadari on”.

(Mat. 21 : 28)

Nasiam sipambasa! Haganup do hita iojur Tuhanta marhorja bani pohon anggurni. Dong do atap aha ihorjahon ham bani pohon anggur ni Tuhanta? Dong do taridah humbani pambahenanmu paboa na martarima kasih do ham bani Naibata halani idop ni uhurni?

Ra sonon balosmu: Dong do namin uhurhu sihol marhorja bani pohon anggur ni Tuhanta, tapi boritan do ahu, marhahurangan do ahu, marsining do ahu, seng margogoh, seng sanggup ahu, seng sanggup ahu mambahen age aha pe.

Tapi sai boi do bahenonmu age aha, age boritan ham, soh i podoman mando ham, ai boi ham sip ilobei ni Tuhanta. Boi itangihon ham atap aha na sihol hataonkon in Tuhanta bamu. Boi ham martonggo pasal dirimu pakon pasal harajaon ni Naibata, harajaon ni Kristus na manggoluh ai. Boi do ham padas tonah ni Naibata bani na roh marjumpahkon ham, pasal barita hatuahon binoan ni Tuhan Jesus Kristus banta.

Pindoonmu ma bani tonggomu: Ham Bapanami na i nagoriatas! Marsahap ma Ham hu bangku, patuduh Ham ma hu bangku atap aha na boi horjaonkonku ibagas pohon anggurmu. Urupi Ham ma ahu mangkorjahon harosuhmu!

Anggo sonai ajaran ni Tuhanta do ham atap sonaha ase boi marhorja ham ibagas pohon anggur ni Tuhanta, ibagas harajaon-Ni, ibagas kuria ni Tuhanta, atap sonaha ase boi idanganmu Tuhanta! Ingat ham ma: Ibotoh Naibata do sagala sitaronon na tampei bamu, halani holongni banta. Songon parlajaran do ai laho pasabar uhur, laho manuju goluh na sadokah ni dokahni ai, siparayakonta, na dob ipasirsir Naibata bani sagala na porsaya.

Anggo dong uhurta manangihon ojur-ojur ni Tuhanta marhorja bani pohon anggur-Ni, sai dapot hita do dalan, sai patuduhonkon ni Naibata do banta dalan ai.

Tonggo

Ham Tuhan Naibata: Sai marsahap ma Tonduymu hubagas uhurhu. Urupi Ham ma ahu laho mangarusi naija harosuhmu horjangku ibagas pohon anggurmu, ase marmulia Ham janah manggoluh ahu.

Amen.

Doding

Haleluya No. 19 : 2,3: Damei do Nimu Bereon >>

2. Ale Tonduy Sipardamei sai masuki hanai on.
Sai pasada uhurnami, ‘se marbuah ganup on.
Sai tangima pinggol nami lao manangar ojur-Mu;
Ase tambah ringgas nami pararatkon hata- Mu.


3. Sada horjaonkon nami, ipindo uhur-Mu in;
Ningon holong atei nami, bai hasomannami in
Ase roh ma gogohnami, mangkorjahon hata-Mu.
Mangkahulhon diri nami bai hasoman ‘pa Bamu.

2 September: Dong do na boi horjaonkon ni ganup Kristen >>

<< 31 Agustus: Aha ma na tarbahen au bani Sipaluah ahu?