2 Oktober: “Mase sai unduk ham tonduyhu anjaha rusak ibagas diringku”

tnt_okt2_panorangsitaroron.jpg

“Mase sai unduk ham tonduyhu anjaha rusak ibagas diringku? Arapkon ma Naibata, ai sai pujionku ope Ia Sipaluah ahu anjaha Naibatangku.”

(Psalm 42: 6)

Ibotoh hita, roh pe banta pusok ni uhur, naborit, na masahit pakon sitaronon, ibotoh Naibata do ai.

Ipaturut do ai masa halani holong-Ni banta. Tujuanni paroh pasu-pasu banta bani goluh ni haporsayaonta. Martonggo ma hita mangkatahon: “Tarolos ma Ham Tuhan mangurupi ahu, padaoh Ham ma hasunsahan on humbangku”.

Tapi ipaturut do hita maruntol songon latihan laho patoguh haporsayaonta. Songon na talu ma tonduyta, sihol uhurta mambotoh: “Ra ope nani Naibata manangihon tonggongku? Seng ididah nani hamarsikonku? Seng be holong uhur-Ni bangku? Atap aha na boi palamlamkon sitarononkon?”
Songon na ibobai do diri mangkalupahon Naibata, marnalang Naibata.

Ulang ham mabiar, manggoluh do Naibata, itangihon do elek-elekmu. Haporsayai ma Naibata, paima ma panorang ni Naibata, urupan-Ni do ham. Ijai ma pujionmu Naibata.

Ingat ham ma sanggah paruntolon ni Kristus nini do: “Sedo guru bangku, uhurmu do”. Idingat hita do sitaronon-Ni na parah ai mandalankon harosuh ni Naibata.

Hataonkonta ma bani Tuhanta: “Domma manaron Ham halani ahu, halani holong-Mu mangidah ahu. Ididah Ham do sitarononku. Bere Ham ma bangku gogoh-Mu mambalosi Naibata ibagas sitaronon. Bere Ham ma bangku uhur na sabar paimahon panorang ni Bapa in. Sai boi ma Ham hutiru manluarhon: Sedo guru bangku, uhurmu do”.

Pangkawahon ni uhurta bani panaronan ni Tuhan Jesus pakon pambalosion-Ni bani Naibata, ai ma mambere gogoh banta ampa sabar ni uhur paima panorang ni Naibata mangurupi hita. Isuruh Naibata do hu Getsemane malekatni margogohi Tuhan Jesus.

Tonggo

Mase sai unduk ham tonduyhu anjaha rusak ibagas diringku? Arapkon ma Naibata, ai sai pujionku ope Ia. Amen.

Doding

 Haleluya No. 154:1, 2, 4 Marsipota pe idahon >>

1. Marsipota pe idahon, hita songon tinadingkon
Ni Tuhanta Bapa in, sedo na tongon sonin

2. ‘Ge malambat pe sipota pangurupi ni Tuhanta,
anggo roh panorangnin, mintor tongoson-Ni in.

4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.

3 Oktober: “Ai iajari Tuhan in do hinaholongan ni uhurni” >>

<< 1 Oktober: Ganup do manumpak bani ni madear bani na marholong ni atei bani Naibata