3 Oktober: “Ai iajari Tuhan in do hinaholongan ni uhurni”

“Ai iajari Tuhan in do hinaholongan nih uhurni anjaha ilonsing do anak na dob jinaloni.”

(Heber 12: 6)

Naibata do tarhatahon na manongos (napaturutkon) masa ai pusok ni uhur pakon sitaronon bani jolma manisia.

Mase ibahen sonai?

Halani holong ni ateini bani sidea. Ra do itongos pusok ni uhur bani na so mardingat. Naibata, laho manogusi hu hamubahon ni uhur janah mangojursi martonggo mangindo idop ni uhur ni Naibata.

Itongos do pusok ni uhur bani anak ni Naibata laho pagodangkonsi, pagodang partonduyonni.
Ididah Naibata do ganup dousanta, ibotoh do hagalekonta, tapi seng ibuang hita, totap do ibere holong bapa ai banta.

Age pe roh panorang na golap banta, sai sihol paluahonni do hita humbani dousanta. Halani ai hataonkonta ma ibagas sitarononta: Naborit on, pusok ni uhur on humbani Naibata do rohni, seng hubalosi Ia, sihol uhu-Ni maluah ahu humbani dousangku, ulang magou ahu.

Jadi songon anak na madear roh hita hubani Bapanta na i nagoriatas ai. Marditoruh ma hita mansopotkon sagala dousanta pakon salahta janah mangindo hasasapanni.

Ibere homa gogoh manlawan dousa. Sirsir bapanta ai mangurupi janah manasap sagala dousanta. Ahaponkonta na margoling pusok ni uhur ai gabe malas ni uhur bani panorang ni hagalekonta margoling gabe hagogohonta, pusok ni uhur gabe malas ni uhur hahurangan gabe pasu-pasu. Idahonta ma goluh marpasu-pasu.

Ulang paturut na golap mangodohkon goluhMu, manrunta janah maporus ma ham bani idop ni uhur ni Naibata. Ulang dong ipingkir ham na dob ganggang ham humbani Naibata. Hatahon ham gelah ibagas uhurmu: Iajar Tuhan in do hinaholongani anjaha ilonsing do anak na dob jinaloni. Ilonsing pe ahu halani huihutkon dalan ni dousa anjaha seng hudalankon halani na pansing ai. Mangojur ahu mulak darngos hu Bani do ai ganupan.

Tonggo

Ham Tuhan Naibata! Urupi Ham ma ahu, ase iakuhon uhurhu na itongos Ham do sitaronon na roh hu bangku. Patoruh Ham ma uhurhu mangindo idop ni uhurMu. Amen.

Doding

Haleluya. No. 154 : 2, 4, 6. Marsipota pe Idahon >>

2. ‘Ge malambat pe sipota pangurupi ni Tuhanta,
anggo roh panorangnin, mintor tongoson-Ni in.

4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.

6. Ia roh pe hamateian, seng be pala au songgotan,
sai hujolom Jesuskin, in ma diha-dihangkin.

4 Oktober: Pargoluh do Tuhanta >>

<< 2 Oktober: “Mase sai unduk ham