“Pardear layak do Jahowa boi gabe batar-batar bani ari hasosakan janah itanda do sagala na martenger ni uhur hu Bani”.
(Nahum 1: 7)
Dong do halak na lungunan ibagas dunia na mariah on, seng dong, iahap hasontanni, seng dong na hampitsi, sahalaksi mando sauhur, sahalaksi sapangahapan, Naibata pe seng dohor bani, sahalaksi do mamorsan pusok ni uhurni, sahalaksi do manjujung jut ni uhurni.
Bani panorang sisonai ma porlu paho hubagas uhurta ayat na tarsurat iatas on: “Pardear layak do Jahowa boi gabe batar-batar bani panorang hasosakan janah itanda do sagala na martenger ni uhur hu Bani” (Terj baru (1976), “Pardear layak do Jahowa, benteng bani panorang hasosakan; anjaha itanda do na marhaporusan bani”), ase mamintor iompaskon dirini hubani Naibata, itulakkon tulak matah dirini bani Tuhan ase. Naibata hatundalanni, batar-batarni parbansahanni.
Dihut do ham ra dob lungunan, na dob tarpunjung songon tanggiang na tarpulou, lang dong be iahap ham na mansarihon ham, seng dong be na mangurupi ham? Roh ma ham bani pardear layak ai, ai ma Naibata. Ompaskon ham borat-ringanmu Bani, ijalo do ham asal tenger uhurmu Bani. Sopotkon ham dousamu ganupan, pindo ham hasasapanni, maidop do uhur ni Naibata bamu, harga do ham Bani. Ibotoh do na tenger uhurmu Bani. Dob ni gabe sonang ma uhurmu. Pindo ham ma humbani Naibata uhur nabayu, pingkiran nabayu. Rumbak hubani Naibata ma uhurmu, surdung hubani Naibata ma uhurmu. Pungkah ham ma martonggo, pungkah ham ma bujur janah pongkut manangar hata ni Naibata, mambasa hata ni Naibata.
Ulak-ulak ham paima somal janah hatagihan ham. Sonang ni halak na porsaya ai na martenger ni uhur bani Naibata mahol do patorangon, tapi Iajou ham pabulat ham uhurmu martenger ni uhur bani Naibata, ulang bani na legan, ahaponkonmu ma sonangni ai.
Tonggo
Ham Tuhan Naibata! Dohor do Ham bangku sanggah lungunan ahu, sanggah seng dong hasomanku sauhur. Bere Ham ma Tonduy-Mu bangku, ase tenger uhurhu bani idop ni uhur-Mu na mangkarga ahu. Amen.
Doding
Haleluya No. 156: 1, 3, 4: Inggot pe Lutu Ganupan >>
1. Inggot pe lutu ganupan sai na sonang do use
Jesus do sai pasonangkon aha na humutik be3. Tong itangihon Tuhanta hita na martonggo in .
Janah itatap Tuhanta ganup tinobus-Ni in.4. Tenger uhurmu bai Jesus, na patorsa langkahmin;
Sai haholongi ma Jesus na pasonang uhurmin
10 Oktober: “Ahu do Parpuhoon pakon Hagoluhan”
<< 8 Oktober: Porluan Ope na Pasomal-somalhon (Disiplin) Tonduy
Recent Comments