“Ahu do parpuhoon pakon hagoluhan, sai manggoluh do na porsaya Bangku age pe matei ia. Janah ganup na manggoluh janah na porsaya Bangku, seng anjai matei sadokah ni dokahni. Porsaya do ham ijai”?
(Johanes 11 : 25, 26)
Sonai ma sungkun-sungkun ni Tuhan Jesus bani si Marta dob matei batouni si Lasarus ondi. Balos ni si Marta: “Eak Tuhan, na porsaya do ahu Ham do Kristus Anak Naibata na roh hu dunia on” (ayat. 27).
Sonai do homa sungkun-sungun ni Tuhan Jesus banta sonari. Pag ma ham nani marbalos humbani gok ni haporsayaonmu songon balos ni si Marta ai?
Aha do isi ni balos ni si Marta ai? Sada ijai seng dong tarpaluahi hita banta, seng dong galangonkonta pasal dousanta, seng dong parombouta na madear ase roh balasni, idop ni uhur ni Naibata do hansa, ai seng itandai hita dirinta. Anggo porsaya si Marta Tuhan Jesus do Kristus Ia ma Sipaluah ai, na boi paluahkon manisia na so tarpaluahi dirini.
Tapi buei do ibagas goluhta on, na so porsaya na manlanggar hata pakon Titah ni Naibata, na mambahen hagigi ni Naibata. Mardousa ari-ari, dobni hu hamatean ma hita.
Bani balos ni si Marta ai, taridah do: Ia Jesus na hun Nasaret ai Ia do Mesias (Kristus) na pinarbagah in janah Anak ni Naibata, na manaron janah matei halani dousa ni dunia on. Marhitei balos ai homa ipatorang seng dong haluahon sobali marhitei haporsayaon bani daroh ni Jesus tumang do dong hasasapan ni dousa.
Na porsaya, puho do partonduyonni janah mambalosi Naibata. Haporsayaon ai do hansa dalanta manjalo idop ni uhur ni Naibata ase boi mulak hita bani Naibata. Sedo horja ni hita jolma, sedo jasa.
“Porsaya do ham ijai?” Malas ma uhurmu mangkatahon tarima kasih halani ibere Naibata Anakni ai paluahkon hita.
Tonggo
Ham Tuhan Naibata! Suruh Ham ma Tonduymu manirangi ahu humbani dousa, manogu ahu hubani haporsayaon na sintong bani Tuhan Jesus Kristus, na dob matei mangkopkop haganup pakon mangkopkop ahu. Amen.
Doding
Haleluya No. 134:1-3: Ambit Lang Ham Rupeihu, ale Jesus >>
1. Ambit lang Ham rupeihu ale Jesus,
jaha daroh-Mu manghakui ahu
mintor huja ma ahu na mardousa, marhaporusan.2. Ai seng be dong na songon Ham Tuhanku,
na parlunggarhon pusok ni uhurhu;
Sahalak Ham do sipasonang ahu, hagoluhanku.3. Halani ai hupuji Ham, o Jesus,
ai dihut au itogu Ham, Tuhanku,
bai partumpuan ni ganup tinobus, ibaen daroh-Mu.
11 Oktober: Songon Dakdanak na Saluyu >>
<< 9 Oktober: Sonang ni halak na porsaya
Recent Comments