17 Nopember: Manasap Dousa ni Hasoman (2)

“Tapi anggo seng isasap hanima salah ni halak dompak hanima, seng sasapon ni Bapanima age salahnima.”

(Mateus 6:15)

Roh do sahali Apostel Petrus bani Tuhan Jesus manungkunsi sonon: “Tuhan, sibar piga hali do mardousa saninangku dompak ahu sasaponku salahni? Pala do pitu hali?”

Nini Tuhan Jesus ma mandompaksi: “Seng huhatahon bam pitu hali, tapi pitupuluh hali pitu hali do.” (Mat. 18: 21,22). Artini ai doskon na mangkatahon torus na sasaponta salah ni sagala na marsalah dompak hita. Atap salah pasal aha pe ai, anggo harosuh ni Naibata, maningon sasapon do.

Anggo lang isasap hita salah ni hasoman banta, seng ra Naibata manasap dousanta.

Anggo porini ihatahon hita: Na baru on domma piga hali husasap salahni, anggo sonari lang be. Arti ni ai: lang be marosuh ham ase isasap Naibata dousamu. Seng iahap ham janginni ai anggo lang ra ham manasap salah ni hasomanmu, anjaha seng maidop uhurmu bani hasomanmu.

Buang ham ma pingkiran na jahat sisonai humbagas uhurmu. Dompakkon ham ma Naibata mangindo idop ni uhur-Ni, ase isasap dousa pasal ai homa.

Uhur holong do mambahen marulak-ulakan uhur dompak hasoman. Uhur holong do mambahen ra hita marsahalihon salah ni hasoman, uhur holong do na marsuruh manganju, uhur holong do na manasap pipot ni hasoman.

Ihatahon Tuhan Jesus hata na iatas in, ase iahap hita banggal ni holong-Ni banta, sonai homa pakon lumbang ni uhur-Ni.

Uhurta na ra manasap ai do na harga bani Naibata ijai. Anggo ra diri manasap, nabotoh do porlu ni hasasapan ai, sonai do porlu ibere Naibata banta hasasapan ni salahta (dousanta) banta. Anggo domma margalar utang, isasap ma partingkian ni utang ai, lang be bangkir uhur ni na marutang ai, sonang ma uhurni.

Ambit haganup ma namin mangarusi janah mangkaporsayai on — lambin buei ma na manasap salah ni hasomanni, lambin matei ma paringoran, lambin dapot ma pardamean i dunia on. Tapi halani seng haganup mamorluhon hasasapan ni dousani, ai ma mambahen sonon lanjar dunia on.

Tonggo

Ham Tuhan Naibata. Bapanami! Suruh Ham ma TonduyMu, ase isuan bangku uhur holong ai, na ra manasap salah ni hasomanku. Sasap Ham ma sagala dousangku. Amen.

Doding

Haleluya No. 133: 1,5,9: Holong do Atei >>

1. Holong do atei ni Naibatangku
parholong atei mangidah au.
Ai ipasirsir do haluahonku
marhitei Jesus Anak-Ni in. 

5. Itaron Jesus do hamateian,
manggalar utang ni dousangkin.
Ai do ‘se ningku tong:
Holong do atei ni Naibatangku mangidah au.

9. Ai ipamalum haholongon-Ni
ganupan sahitni uhurhon.
Ai do ‘se ningku tong:
Holong do atei ni Naibatangku mangidah au.

18 Nopember: “Anggo mardousa saninamu” >>

<< 16 Nopember: Manasap Dousa ni Hasoman