28 Oktober: Sada Tanda Hamubahon ni Uhur

“Na dob manangko hinan ulang be manangko, tapi marbaenon ma ia ihorjahon tanganni ma na madear, ase dong bereonkonni bani na hurangan”.

(Epesus 4: 28)

Ijon ididah hita pargolingan. Paima roh parubahan ni panangko, dirini do na ipingkirhon, seng parduli bani na legan. Dob botul sada halak margoling atap marubah lang be dirini gabe tujuan ni goluhni, marpingkir ma ia mangurupi halak na legan, mangurupi na hurangan.

Domma iahap ham parubahan na sonai ibagas goluhmu? Atap pasal dousa naija pe? Si Johannes Pandidi, sonai pakon Tuhan Jesus pe, mangkatahon: “Paubah nasiam ma uhur nasiam”! Boronganta do ihatahon hata ni Naibata anggo napaubah uhur. Seng ihatahon Naibata: “Hupaubah pe uhurnima!” Halani ai maningon marbois gogoh do hita laho paubah uhurta, laho pagoling uhurta. Dob maruntol hita ijai pe hita mangindo pangurupi ni Tuhanta. “Urupi Ham ma ahu Tuhan paubah uhurhu!”

Ra do Tuhanta mengurupi hita. Seng sungkup santorap hita paubah uhur, maningon marnunut-nunut do. Songon pakeanta na lambin kotor ibahen orbuk na habang i tanoh on, sonai do uhurta ibahen orbuk ni dousa, porlu do tong sabunon. Roh ma hita bani na hurangan.

Pargolingan ni na dob mubah ai torang do bani ayat na iatas in. Sanggah panangko, humbani halak do ibuat hubani. Dob marubah ai humbani ma ibuat bereonkon bani na hurangan.

Sada tanda ni uhur na dob mubah do na mansarihon hasoman. Ibagas na mansarihon hasoman, ijai ma roh sonang ni uhur pakon malas ni uhur. Ai ma pasu-pasu ni Naibata na mamintor jaloon ibagas goluh on. Ase barang ise na mangkaholongi na legan, sonai do roh malas ni uhur hubani sandiri, humbani Naibata.

Tonggo

Ham Tuhan Naibata! Tarima kasih ma halani hatamu. Urupi Ham ma ahu ase hubotoh janah malas uhurhu mangidangi hasomanku. Amen.

Doding

Haleluya No. 108: 1, 2, 11: Sanggah Holong Tong Tuhanta >>

1. Sanggah holong tong Tuhanta, na mangidah hita on
Imbang hita ma dirinta tanda jora hita on.

2. Sai tundali na madorsa, sai dompakkon Naibata,
Tanda na tongon porsaya ho bai Tuhan Naibata.

11. Haganup na bujur uhur mangihutkon Jesus in,
Sai ilawan na masambor ronsi rotap hosahnin.

<<27 Oktober: “Maluah ma ham humbani naboritmu in”

29 Oktober: “Porini dong atap ise na mardousa”>>