22 Oktober: “Patotaponni do nasiam das hu ujung …. ari ni Tuhan Jesus”

“Patotaponni do nasiam das hu ujung, ulang dong sihataon be bani nasiam bani ari ni Tuhan Jesus”.

(1 Korintus 1 : 8)

Seng ibotoh hita atap aha na laho masa bani goluhta. Ra do roh panorang na golap, parlajoan no paroh. Tapi age sonaha pe anggo hubani Naibata do hita mangunsandei, seng anjai mahua hita. Sitaronon pe boi do patudu langkahta na dompak datas ai. Boi do sitaronon ai manumpaki hita ase lambin toguh haporsayaonta janah lambin totap pangarapanta.

Sihol patotapon-Ni do hita das hu ujung. Jolomon-Ni do hita paima marpunsa paruntolonta bani rotap ni hosahta. Atap poso pe hita atap toras, seng ra Naibata manadingkon hita, sai itogu do hita ase dohor janah rapat hu Bani. Naibata na markuasa ai sihol patotap hita das hu ujung. Napuji ma goranni na pansing ai.

Seng boi hupatotap diringku, Naibata do patotap ahu, ai do ase itogu ahu rapat hu Bani ibagas holongni. Ase porsaya pe ahu Bani Ia do homa na mambere haporsayaon ai. Ase gok Bani ahu, manjalo idop ni uhur-Ni. Songon na ihasomani Naibata ahu ronsi sonari, hasomanni do ahu das hu ujung ni langkahku.

Ari ni Tuhan Jesus na hinatahonni bani ayat in, ai ma ari parrohni mangalop na porsaya. Tapi ari ni Tuhanta do bani ganup halak parroh ni Naibata bani ujung ni goluhni.

Ai lang sihataon do ganup hauhuronta hatanta pakon parlahouta? Ia lang pe haganup buenan sihataon ma. Sonaha do mambahen ulang sihataon be hita? Sagala dousanta na ibagas uhur pakon na pinarlahouhon pe boan hita ma bani Naibata marhitei Tuhan Jesus. Pindo hita janah jalo hita ma hasasapanni, ase borsih hita halani daroh ni Tuhan Jesus, na dob madurus manggalar ulang dousanta. Anggo domma sasap dousanta, borsih ma hita ilobei ni Naibata.

Tonggo

Tarima kasih ma Bamu Naibata halani ra do Ham patotap hanami das hu ujungni. Urupi ham ma ahu, ase soh Bamu ahu lanjar. Amen.

Doding

Haleluya No. 102 : 3, 4: Ham Tontong Ihutkononku >>

3. Atap aha pe namasa, malas uhur, pusok pe,
Jolomanku na maharga na marholong atei pe’
Ai sadokah au manggoluh, ‘ge dob bois bohalhon,
Ningon Ham, o Sipagoluh, pujionku sai tongtong.

4. Sai iankon Ham uhurhu, Jesus, bani Tonduy-Mu.
Ronsi ujung ni langkahku, ham, o Tuhan togu au.
Ia rotap pe hosahku, gombur pakon matangkin,
olom Ham tongtong tanganku, ronsi das hu surga in.

23 Oktober: ” …humbani tanganmu do tungguonku darohni” >>

<< 21 Oktober: Na dob lupa do nani Naibata bangku?