18 Oktober: “Aha do bahenonku ase dapot hagoluhan sadokah ni dokahni?”

“Jadi migar ma bohini mambogei hata ai, misir ma ia ibagas pusok ni uhur, ai pararta na buei do ia”.

(Markus 10: 22)

Aha do bahenonku ase dapot ahu hagoluhan sadokah ni dokahni?

Sonai ma sungkun-sungkun ni garama na bayak na bani barita on. Ongga do isungkunkon ham bani dirimu sungkun-sungkun na sonai ai? Ongga ma isungkunkon ham ai bani Tuhan Jesus? Sonaha domma dapot balos ham?

Dapot hita do balos ni Tuhanta na songon bani garama na bayak ai. Pindoonta ma bani Tuhanta ase ibobai hita humbani dalan hasintongan, anggo dalan hasintongan mamontas do ai humbani pamah toruh ni uhur. Dalan na dompak hagoluhan ai seng lambin urah bontason, tapi lambin mahol do. Boi do ai ipamahol habayakon, ipamahol habotohon.

Uhurta boi do ujionta marhitei na patudoskon bani Titah ni Naibata. Ra do homa bolos songon garama na bayak ai: Domma hudalankon ai humbani etek-etekon nari.

Anggo pardarat hansa napareksa ra do madohor sintong balos ai, tapi anggo uhurta ipareksa hita panlanggar do hita, ganup hape. Uhur ai do ididah Tuhanta. Dob ihatahon Tuhan Jesus dompak garama na bayak ai ijuali ganup artani janah iberehon bani na masombuh dob ai iirikkon ma Tuhan Jesus ijai ma “migar bohini”, seng tontang be iahap. Na bayak do ia domma ijajah habayakon ai ia. Arta ai do ididah Tuhan Jesus na mangambatsi na mangambat ai do isuruh Tuhan Jesus ipadaoh, ase Babe susian ni Tuhan Jesus ia. Jadi misir ma ia ibagas pusok ni uhur.

Maningon biaran uhurta janah holongan ateita bani Naibata ase mangidah sagala na dong. Anggo longkot uhurmu bani sada-sada na harga ninuhurmu, seng boi ham mangihutkon Jesus, ai ma manirang hita humbani idop ni uhur ni Tuhan Jesus. Sisonai migar ma bohini manadingkon Tuhan Jesus. Maningon ihunsangkon ham do duitmu ase duitmu ai goranon, tapi anggo ihunsangkon duit ai ma uhurmu, ia ma manjajah ham. Sisonai do age arta, ningon hita do simadasi, ulang arta ai simada hita.

Tonggo

Ham Tuhan Jesus! Urupi Ham ma ahu padaohkon sagala na mangambat ahu mangirikkon Ham. Amen.

Doding

Haleluya No. 124: 1, 2:  O Tuhan Pareksa Ham Au >>

1. O Tuhan pareksa ham au sondangi uhurhu tangkas.
Ai seng dong margogoh be au.
Bamu au paringgas, Bamu au padonok, Bamu mando au.
Bamu au paringgas, Bamu au padonok, Bamu mando au.

2. Huja ma marguna be in, age pe marnah ringgit au?
Ibabou hasusurankin,
Ham Jesus artangku, hujai do siholhu, sonang uhurhin,
Ham Jesus artangku, hujai do siholhu, sonang uhurhin,

19 Oktober: Tapi na so tarbahen jolma ai tarbahen Naibata do >>

<< 17 Oktober: Aha na patut horjahonanta ari Minggu?