17 Oktober: Aha na patut horjahonanta ari Minggu?

tnt_okt17_marminggu

“Halani jolma do ase iaturhon ari Sabbat, sedo halani ari Sabbat ase itompa jolma”.

(Markus 2: 27)

Ari Sabbat ni Jahudi na songon paraturan na koras bani sidea, seng margogoh be ai bani anak ni Padan na Baru, ai sedo hita Jahudi, tapi hita Kristen do. Na laho do uhurta bani na dob matei mangkopkop hita anjanah puho bani ari parlobei. Aturan do anggo ari Sabbat. Ari Minggu do puho Tuhan Jesus, ari Minggu ai iparayak susianni lang dihut si Tomas, ari Minggu na mangihut iparayak susianni dihut ma si Tomas. Dapot uhur ni halak Kristen ma: Marosuh do Tuhan Jesus manohu susianni ari Minggu, ai do ase marosuh halak Kristen martumpu ari Minggu ai, sedo ulang tahun atap ulang bulan, tapi ulang minggu parpuho ni Tuhan Jesus do ari ai.

Bani ari palima puluhkon dob Pesta Paska, ijai do roh Tonduy na Pansing iuseihon Naibata bani susianni mungkahni. Anggo Tonduy ni Naibata pe marosuh manogu kuriani ari Minggu, mase pala dong martumpu be bani ari Sabbat.

Ase girah humbani mungkahni lambin tading ma ari Sabbat, lambin ibosarhon ma ari ni Tuhan in, ari parpuhoonni. Halani ari Minggu martumpu Kuria ni Naibata na pansing in janah mambogei hata ni Naibata na pansing in. Mandoding mamuji Naibata na pansing ai, gabe ari na pansing ma homa ari Minggu in use, sonai ma ronsi sadari on. Dob marhorja hita onom ari marsaran ma hita sadari on. Anggo marhorja hita bujur onom ari ipasu-pasu Naibata ma horjanta, sungkup ma balanja pitu ari.

Ase ulang, pala rusak ham lang sungkup balanjamu halani na marsaran ai ham sadari, pasu-pasu ni Naibata do pasungkupkon ai.

Aha na patut horjaonkonta ari Minggu? Panguntuni marparsaoran pakon Naibata ampa Tuhanta Jesus, sonai homa Tonduyni. Manangkasi Hatani, mambasa Hatani pakon marimbagaskon. Laho hu gareja mamuji Naibata, manohu hasoman na boritan, parayak na na marpusok ni uhur, mangarahkon ase roh hasoman marminggu.

Ari malas ni uhur ma ari ai bahen hita itongah jabunta, panorang na dear ma i rumah marsahapi pasal partonduyon ni hita nasarumah pasal haporsayaon.

Tonggo

Ham Tuhan Naibata, urupi Ham ma hanami ase ibotoh hanami mamakei arimu na pansing in. Amen.

Doding

Haleluya No. 20:1, 2, 4: Haleluya Ari Minggu >>

1. Haleluya ari Minggu, ari sidearan in
Anggo diri lao martumpu, ‘pa hasoman Kristen in.
Ari na sumurung in, pamalaskon uhur in

2. Na marsaran do tonduyhu bani ari Minggu in.
Ganup pusok ni uhurhu huogapkon do ijin.
Das hubagas uhur ni Jesus Kristus Tuhankin.

4. Harosuh-Mu, 0 Tuhanku sihol bahenonku tong .
Hupadear parlahouhu pasangapkon Ham tongtong.
“Hiou hapintoron” in bere Ham bai tonduyhin.

18 Oktober: “Aha do bahenonku ase dapot hagoluhan sadokah ni dokahni?” >>

<< 16 Oktober: “Dompak Ham ….sandiri do ahu mardousa”

tnt161017