22 Juni: Dalan hu Harajaon ni Naibata

“Tapi nini si Abraham ma: dong do bani sidea (surat ni) si Musa pakon nabi, ai ma itangihon.”

(Lukas 16: 29)

Domma ipatuduh si Musa pakon nabi-nabi dalan dompak Naibata. Anggo idalankon hita songon pinodahkon ni ai masuk ma hita hu harajaon ni Naibata.

Uji hita ma lobei uhurta mardomu bani titah na sapuluh in, laho pasirsir uhurta bani paruhuman banggal ai ilobei ni Naibata. Iahap hita do na maningon hona uhum do hita ilobei ni Naibata, ai ilanggar hita do titah-Ni ari-ari, ia lang pe marhitei pambahenan tapi marhitei uhurta ilanggar hita do.

Ai ma marsuruh hita mangindo idop ni uhur ni Nabata, ase ulang magou hita halani dousanta. Maidop do uhur ni Naibata mangidah hita, ra do Ia manasap dousanta marhitei daroh ni Tuhan Jesus na dob manggalar utang dousanta. Anggo roh hita mangompaskon ai hubani Naibata, jaloonni do hita, Domma ihatahon Tuhan Jesus hinan: “Roh ma nasiam hu Bangku sagala na loja pakon na boratan ase Hupasonang, nasiam“.

Markuasa do Tuhan Jesus manluarhon ai, ai halani panlanggaronta do Ia hona pantom. Ompas hu Bani do pinsang-pirsang parhitean ni hasonanganta anjaha binahen ni ugahni malum iahap hita. (Jesaya 53 :5)

In ma dalan hu harajaon ni Naibata. Seng dong dalan na legan. Jadi maningon bukaonta do uhurta dompak hata ni Naibata, na sinurat ni si Musa, na sinurat ni nabi-nabi, na sinurat ni Apostel ni Tuhan Jesus. Ai hata na humbani Naibata do isuratkon sidea, lang dong dalan na legan. Tuhan Jesus do hinatahon ni sagala nabi. Tuhan Jesus domma ipatuduhkon dalan banta: Roh hita hu Bani. Ase ai ma dalan ai: Roh ma hita bani Tuhan Jesus, ase manggoluh hita.

Tonggo

Ham Tuhan Jesus! Urupi Ham ma hanami manjalo hata-Mu.

Amen.

Doding

Haleluya No. 18: 1- 2: HataMu, ale Tuhanku >>

1. Hata-Mu ale Tuhanku, arta siharganan ai
Sai palongkot bai uhurhu, ulang lang hujolom ai
Anggo seng be sijoloman Hata na madear ai
aha ma na baen onjolanni haporsayaonkin

2. Ale Jesus sai kawahkon, sai parorot Ham au on
‘Se totap haporsayaon mangiankon uhurhon
Sai paringgas Ham uhurhu, manangihon Hata ai
Sai horahan bai podah-Mu, songon si Maria ai

23. Gok Bamu do Sonari >>

 << 21. Pilihan Siayakononta