“Tonduy ni atap ise na mardousa, ai do matei”.
(Hesekiel 18: 4)
Ihatahon Naibata: “Tonduy ni atap ise na mardousa, ai do matei“. Jolma na mardousa ai seng be dong arapanni. Roh ma hamatean, roh ma paruhuman dob ai masuk bani hamarsikon sadokah ni dokahni.
Tapi seng marosuh Naibata namin sonai. Seng marosuh Naibata matei halak ibagas dousani. Anggo harosuh ni Naibata, parjahat in mulak namin humbani hajahatonni janah manggoluh.
Pingkir ham ma on lobei: Sihol sasapon ni Naibata dousamu ase manggoluh ham. Ingat ham ma aha na dob ibahen Naibata bamu: Domma ijalo ham gabe niombahni bani pandidion na pansing in, sihol pamasukon-Ni do ham hu nagoriatas.
Tapi sonaha ma, anggo seng ham ra? Maidop do uhurni mangidah ham, sai sihol paluahon-Ni do ham humbani dousamu hamarsikon na sadokah ni dokahni ai. Anggo pintor do ibahen Naibata banta, sintong do songon na iatas in magou ma hita.
Halani ai sungsung hita ma roh hubani Naibata boan hita ma ganup dousanta in, pindo hita ma idop ni uhur-Ni ase isasap dousanta halani Tuhan Jesus na dob matei mangkopkop hita. Seng marosuh Naibata bani hamagoan ni parjahat, mulak na namin parjahat in manadingkon dalanni ase manggoluh ia. Sihol ma namin mangihutkonsi ganup jolma na i tanoh on anjaha das use bani malas ni uhur na sadokah ni dokahni ai.
Ase gok bamu do sonari, atap masuk ham bani malas ni uhur atap bani pusok ni uhur na manorus ai. Ai anggo idompakkon ham Naibata janah itundalhon ham sibolis pakon dousa, manggoluh ma ham. Tapi anggo idompakkon ham sibolis pakon dousa, itundalhon ham Naibata, magou ma ham ronsi sadokah dokahni. Seng boi iurupi na legan hita. Atap ise na mardousa ai do matei. In manjalo in marhonong, in mardousa in manaron. Ai Iang tarpaubah be ai.
Tonggo
Ham Tuhan Naibata Na mardalan ibagas pardousaon do ahu, toga Ham ma ahu ase manggoluh ahu Bamu.
Amen
Doding
Haleluya No. 148 : 2,3: Layak do Ham Mambere Au >>
2. Pardousa na banggal do au, pansing do anggo Ham ;
Sai bai na dorsa laho au bai na jahat naman .
3. O Tuhan, husopotkon ma ganupan dousangkin ;
Holong ma Ham, sai sasap ma, Bamu ma tonduyhin.
Recent Comments