7 Maret: “Tambahi Ham Ma Haporsayaonnami!”

Dob ai nini Apostel in ma dompak Tuhan in, tambahi ham ma haporsayaonnami! 

(Lukas 17:5)

Buei do halak na mangindohon bani Naibata: Tambahi Ham ma haporsayaonnami. Na mangindo ai, na dob iahap do otik ni haporsayaonni pakon galekni. Ipindo ipargogohi Naibata ase lambin tenger uhurni bani Naibata pakon bani Hatani. Ra do Naibata mambalosi tonggo na sonai ai. Ra do Ia mangurupi niombahni, ase lambin margogoh janah tambah haporsayaonni.

Tapi ulang hita lupa, itopa Naibata do hita hubani haporsayaon, ningon ipasirsir do hita ase das bani haporsayaon ai janah lambin banggal haporsayaon ai. Idalankon do ai marhitei pangujian na lambin borat songon na bani si Abraham. Ujungni pag ma ia, ra ma ia manggalangkon anakni si Isak.

Banta pe ra do Naibata mambere haporsayaon na banggal. Anggo sihol pasirsiron ni Naibata ma hita ase banggal haporsayaonta, ra do itohu hita marhitei sitaronon pakon hasunsahan. Ijai sungkun-sungkun ma uhurta: On do nani balos ni tonggonami? Tongon do ai do balos ni tonggomu. Ra do mungkah ni bolos ni tonggomu do ai.

Ase age roh na borat tumang hu banta, ulang itundalhon hita Naibata. I parsikolahan ni Naibata ope hita, ajaranni ope hita (latihonni), ase lambin mangasup (sanggup) bani haporsayaon na banggal na mangarapkon nagoriatas ai. Sai idilo hita Naibata, sai ipindo hita ulang itundalhon Ham ahu, nape lalab lang pajumpah bohi hita pakon Naibata.

Roh ma sungkun-sungkun ni uhurta: Na dob itadingkon Naibata do ahu? Tenger ma uhurmu seng itadingkon Naibata ham, tapi iajari do ham ase lambin banggal haporsayaommu.

Tonggo

Ham Tuhan Naibata, tambahi Ham ma haporsayaonnami. Sai itangar hanami ma balos-Mu bani tonggonami, sai iahap hanami ma itohu Ham do hanami age marhitei pusok ni uhur.

Amen.

Doding

Haleluya No. 119 :1, 2. Bintang Pambobai >>

1. Bintang Pambobai Batu Gingging in
Tungkot sijolomon bai na landit in
Ruti hagoluhan bah na torsuk in
Alat situjuan in ma Jesus in.
Alat situjuan in ma Jesus in.

2. Ham tongon gogohku, pangajamankin,
damei ni uhur-Mu, hasonangankin
Goluh ni tonduyhu, hatuahonkin,
in ma alo Tuhan; Ham tumang do in.
in ma alo Tuhan; Ham tumang do in.

8 Maret: Hatangeran ni Uhur do Anggo Naibata  >>

<< 6 Maret: Itonggohon Jesus Ase Ulang Miloh Haporsayaonta