8 Maret: Hatangeran ni Uhur Do Anggo Naibata

Ia lang pe hatengeran ni uhur hita hatengeran ni uhur, tong do Ia (Naibata) hatengeran ni uhur, ai seng tarparnalang-Si dirini.

(2 Timoteus 2:13)

On ma sungkun-sungkun banta sanggah na laho tardidi atap sanggah manaksihon haporsayaon: Porsaya do ham bani Naibata Bapanta pakon bani Tuhanta Jesus Kristus ampa bani Tonduy na Pansing? Balosta: Porsaya do. Ai pe ase saud hita tardidi atap manaksihon haporsayaon, bbani mungkah ni ondi.

Dong ope sada nari sungkun-sungkun sonon: Ra do ham marminggu siang minggu anggo jorgit do ham? Balosta ijia: Ra do. 

Marpingkir ma hita tongkin pasal na dua pahara pangakuanta ai. Totap do porsaya ham janah tenger do uhurmu bani Naibata Bapanta pakon bani Tuhanta Jesus Kristus ampa bani Tonduy na Pansing? Ai lang gati do ganggang haporsayaonta, janah dong use hatengeran ni uhurta na legan sobali Naibata Sitolusada ai? Age pe sonai anggo Naibata tong do ihira hita anak niain-Ni.

Ai lang gati ma ilanggar ham padanmu? Ai lang ongga do ham holang lang marminggu sanggah ari minggu, age pe jorgit do ham? Anggo sonai lang be hita hatengeran ni uhur, tapi Naibata dong do la hatengeran ni uhur. Tong do holong uhur-Ni banta. 

Tapi sada na porlu banta, ningon roh hita bani Bapanta ai patugahkon (mansopotkon) halepakanta ai, janah mangindo hasasapan ni dousanta ai, ase isasap, halani holong-Ni banta.

Ulang biaran ham roh bani Tuhanta pakon Bapanta Naibata age pe domma ham mangelukkon padan, anggo Naibata totap do padan-Ni. Ra do la manasap dousamu janah ijalo do ham gabe niombah-Ni.

Tonggo

Ham Tuhan Naibata! Hupuji janah hupasangap do Ham halani lumbang ni uhurmu mangidah hanami, seng ibaloskon Ham dousanami. Urupi Ham ma hanami ase totap mardingat padannami hu Bamu.

Amen.

Doding

Haleluya No. 148 :1-3. Layak do Ham Mambere Au>>

1. Layak do Ham mambere au , O Jesus Tuhankin,
Ihutkon Ham daoh pe au, mambuat uhurhin.

2. Pardousa na banggal do au, pansing do anggo Ham;
Sai bai na dorsa laho au bai na jahat naman.

3. O Tuhan, husopotkon ma ganupan dousangkin;
Holong ma Ham, sai sasap ma, Bamu ma tonduyhin.

9 Maret: Manjalo Gogoh Laho Mangimbang Sagala Parlajoan  >>

<< 7 Maret: “Tambahi Ham Ma Haporsayaonnami!”