8 Agustus: Seng Ihalupahon Naibata Hita

tnt_agu8_pangurupionni naibata

“Ingat ma ale Israel seng anjai halupaonkon-Ku ho.

(Jesaya 44: 21)

Idilo Naibata do ganup goranta. Domma iain hita gabe niombah-Ni. Ihatahon do banta sanggah na tardidi hita: “Ahu do simada ho! Tonggor ma domma Hu uhirhon goranmu bani jampal ni tangan-Ku”.

Halani ai boi ma hita marmalas ni uhur tongtong, seng be dong na manirang hita humbani Naibata. Domma ibagahkon Naibata bani halak Israel naijia, seng halupaonkonni sidea. Sonai do bani Israel Padan na Baru (Kristen) seng halupaonkonni hita, seng paturutonni hita. Ingat hita ma ai sanggah bani paruntolonta: “Seng halupaonkon-Ku ho!”

Ra do martorap iahap hita songon na itadingkon Naibata hita. Tapi sedo na tongon sonai. Ningon poltik jolom hita Hata ni Tuhanta ase sonang uhurta. Seng ihalupahon Naibata hita. Bani masa ni sitaronon atap pusok ni uhur, porlu na parulak-ulakhon on ibagas uhurta: Seng ipaturut Naibata ahu, seng ipalupahon ahu.

Anggo sanggah jorgit do angkulanta pakon uhurta, urah do mangkatahon hata in, tapi anggo roh ma sitaronon bani angkula, tarlobih bani uhur, ijai ma gati lupa hita bani bagah-bagah ni Naibata. Ongga do hita mangan na mantin janah bosur, anggo sanggah lohean ma hita lupa ma ai haganupan. Buei janah gati do ijalo hita pasu-pasu ni Naibata. Tapi bani panorang pusok ni uhur pakon sitaronon, songon na so ongga be hita manjalo pangurupi ni Naibata.

Bani panorang sisonai ma porlu ingatonta sagala bagah-bagah ni Naibata: Na so itadingkon hita, na so ipaturut hita. Porlu tenger tumang uhurta bani bagah-bagah ai, bani hata ni Naibata. Ai do homa mambere gogoh banta ase sabar hita paimahon panorang ni Naibata.

Ingatonta do, bani panorang sisonai husiponkon ni Sibolis do banta, na so parduli be Naibata banta. Sagala na pabungbang uhurta bani pangurupi ni Naibata, na humbani Sibolis do ai.

Tonggo

Ham Tuhan Naibata! Urupi Ham ma ahu ase tenger tumang uhurhu hani bagah-bagah-Mu, ase sabar janah margogoh ahu paima panorang-Mu.

Amen.

Doding

Haleluya No. 154: 1, 4, 5: Marsipota pe Idahon >>

1. Marsipota pe idahon, hita songon tinadingkon
Ni Tuhanta Bapa in, sedo na tongon sonin

4. Tenger uhur bai Bapangku naha pe hasosakan ku,
sai holong atei-Ni in dompak au anak-Ni in.

5. Setan, jolma pe porini naha pe panunsahini,
mesek au mangidah in, ai manggoluh Bapangkin.

9 Agustus: Manaron rap pakon Kristus >>

<< 7 Agustus: Mardear pakon imbang-imbang

tnt160808