7 Agustus: Mardear pakon imbang-imbang

tnt_agu7_mat5_25

“Podas ma ham mardear pakon imbang-imbangmu, sanggah rap i pardalanan ope, ase ulang holi iondoskon imbangmu ai ham bani panguhum, gabe iondoskon panguhum ai ham bani upasni, gabe inahkon hubagas tutupan.”

(Mateus 5: 25)

Rap i pardalanan do hita pakon hasoman jolma laho hu paruhuman banggal ai, paruhuman magira ai. Sonaha timbanganta pasal hasomanta, songon timbanganta ai do bahenonni Naibata timbangan banta, ai nini Tuhanta: Parsuhatan na binahenta ai dompak hasoman, ai parsuhatan banta. Ia na maidop do uhurta dompak hasomanta na marosuh ma hita manjalo idop ni uhur.

Mardalan ma hita songon pinindo ni Tuhanta pardalanta, pasomal hita ma mangkaholongi hasomanta, songon dirinta sandiri. Dear janah basar ma hita dompak na mambahen na dear dompak hita, tapi sedo pitah ai, dear janah basar ma hita dompak na mambahen na hurang dompak hita, dompak na ginoran imbang-imbangta. Sibar na tarbahen bahenonta ma na mambahen na madear dompak na manlawan hita.

Talu do apuy na milas ibahen bah na mangilu. Talu do ringis ibahen hata na lamlam. Tongon sada horja na mahol do ai, halani gati iapiti hita dirinta, ipintori hita tong dirinta. Ulang hita lupa, hita pe gati dapot panganjuon humbani Naibata ampa humbani hasoman jolma, halani uhurta, hatanta ampa parlahouta na hurang.

Ingat hita ma lumbang ni uhur ni Naibata dompak hita. Mardousa do hita janah gati itundali hita Naibata. Ilanggar hita do gati hata-Ni ampa titah-Ni. Hurang porsaya hita bani holong-Ni na banggal ai. Age pe sonai sai ibere do banta idop ni uhur-Ni, Lumbang do uhur-Ni mangidah hita. Ijalo do hita gabe juak-juak-Ni, ijalo do hita gabe niombah-Ni. Maidop do uhur-Ni age pe songon munsuh-Ni parlahouta.

Tonggo

Ham Tuhan Naibata! Urupi Ham ma ahu mangimbang uhurhu, ase ra ahu marditoruh dompak hasomanku na i pardalanan ope, mangindahi pardearan. Tambahi Ham holongku dompak hasomanku.

Amen.

Doding

Haleluya No. 177: 1, 3, 5: Barah ma Jumpah Padan in >>

1. Barah ma jumpah padan in, in ma panrohni Tuhan.
Hubani manisia in, mandabuh paruhuman.
Bai ganup na manggoluh in, age bai na dob matei in,
Sonai do ihatahon.

3. Basaon ma podas ijin pustaka partingkian,
Ni ganup na dob ongga in binaenni hajolmaon;
Ijin torang ibogei bei ganup hinorjahonni bei
Sadokah bai goluhni.

5. Urupi Ham ma au ijin, Ham parholongni atei,
Ase tarsurat gorankin tanda ni dousa sahei.
Tenger ma uhurhin ijin, ai domma talu munsuhkin,
Margalar ma utangku.

8 Agustus: Seng Ihalupahon Naibata Hita >>

<< 6 Agustus: “Jahowa Siparmahan Au”