6 September: Mase otik pasu-pasu ni Naibata iahap hita?

“Ahu do Tuhan Naibatamu na patangkog ho hun Masir, pangangang ma pamanganmu ase hugoki”!

(Psalm 81 :11)

Mase otik pasu-pasu ni Naibata banta iahap hita?

Halani seng buei hita mangindo humbani Naibata, seng buei tenger ni uhurta Bani. Seng buei hita mangindo partolongan Bani.

Ibotoh Naibata do ai, ai do ase marosuh Ia roh hita hu Bani, ase ibere banta pasu-pasuni na banggal. Ai do halani ase ihatahon: “Pangangang ma ma pamanganmu ase hugoki”.

Roh ma hita hubani Naibata ibagas tenger ni uhur manjolom hata ai: “Ahu do Tuhan Naibatamu”. Idingat do hita tinompani, ibere banta pamatang pakon tonduy, marpangidah pakon marpamangan, ronsi marpangahap.

Sibanggalan ijalo hita gabe niombah-Ni bani pandidion na pansing ai, ipio hita mangirikkon-Si, ipadihut hita gabe bala surga ibagas goluhta on.

Hunjai nari ihasomani hita ari-ari, humbani minggu hu minggu, humbani bulan hu bulan, ronsi humbani tahun hu tahun. Isarihon banta sipanganon ronsi parhiouon ampa iananta (rumahta), ipasirsir hade-hade, huan-huan ronsi na dong banta.

Ai lang tanda do ai paboa na holong uhur-Ni banta, na ra mambere na madear bani pamatang ampa tonduyta? Nape mangkawah hita ihatahon ma: “Pangangang ma pamangan nima ase hugoki”. Bani halak Israel ihatahon Naibata: “Tapi bangsangku, seng itangihon sorangku, Israel seng roh hu Bangku.”

Sonai do nani hataonkon ni Naibata hu banta? Ibalos-balosi hita do dousanta, janah seng masihol hita bani idop ni uhur ni Naibata?

Buhai hita ma pamanganta laho martonggo, ra do Naibata mambere na porlu banta na so niagak ni uhurta. Domma iboan Israel tangkog hun Masir, hita pe domma iboan tangkog humbani lombang dousa, paluahkon hita humbani parjabolonan ni dousa pakon sibolis.

Halani ai hita pe buha hita ma pamanganta, ase igoki, ase ibalanjai.

Tonggo

Ham Tuhan Naibata, Bapanami! Holong do uhurmu bannami, ipindo Ham do ase mangindo hanami bani sagala na porlu bannami, ra do Ham mambere ai gari haluahonnami itagang Ham. Tarima kasih ma Bamu.

Amen.

Doding

Haleluya No. 161 : 1-3: Tuhanta ma Napuji >>

1. Tuhanta ma napuji ibaen dear gabei-Ni,
Mambere panganonta, holong atei-Ni banta.

2. Dagingta ‘pa tonduyta ibere do hubanta;
Seng dong pingkir Tuhanta membere in hubanta.

3. Dagingta iparmudu, tonduyta ipagoluh;
Sonin ma lah uhurta, age tarsosak hita.

7 September: “Marhitei hatamu do ho uhumonni” >>

<< 5 September: “Jahowa uhur ibagas do niidah-Ni”

tnt0906